Ձեր վստահելի աղբյուրը

Սահմանադրական դատարանի նախագահի մեկ առաջադրված, մեկ ինքնաառաջադրված թեկնածու կա։ ՍԴ շենքի բակում լրագրողների հետ զրույցում ասաց ՍԴ դատավոր Արևիկ Պետրոսյանը:

«Այս պահին արդեն անցում ենք կատարել թեկնածուների քննարկմանը։ Եղել է ինքնառաջադրում։ Քանի որ դեռ պրոցեսի մեջ ենք և դեռ առաջադրումների և ինքնառաջադրումների հետ կապված ինքնաբացարկներ չեն ներկայացվել, եկեք առաջ չանցնենք իրադարձություններից։ Մեկ ինքնառաջադրում և մեկ առաջադրում է»,- ասաց Արևիկ Պետրոսյանը։

Հարցին՝ նորընտիր դատավորներից կա՞ թեկնածու, վերջինս դրական պատասխան տվեց։

Լրագրողի հարցին՝ Երվանդ Խունդկարյանն ինքնառաջադրվե՞լ է, Դիլանյանին առաջադրե՞լ են, ճի՞շտ է, ՍԴ դատավորն ասաց. «Մասամբ է ճիշտ»։

Հարցին՝ արդյոք այսօր տեղի կունենա՞ ընտրություն, նա պատասխանեց, որ չի կարող ասել։

Հիշեցնենք, որ սեպտեմբերի 23-ին Սահմանադրական դատարանում կայացել է աշխատակարգային նիստ, որի օրակարգում էր Սահմանադրական դատարանի նախագահի ընտրության հարցը: Սակայն աշխատանքային օրվա ավարտով պայմանավորված՝ նիստը չէր ավարտվել: Այն շարունակվում է այսօր: 

ՍԴ 9 անդամներից յուրաքանչյուրը կարող էր և ինքնառաջադրվել, և առաջադրել այլ թեկնածուի: «Սահմանադրական դատարանի մասին» ՀՀ օրենքի 19-րդ հոդվածի համաձայն՝ Սահմանադրական դատարանի կազմից նախագահ կարող է ընտրվել այն թեկնածուն, որը ստացել է դատավորների ընդհանուր թվի ձայների երկու երրորդը, որը կազմում է 6 ձայն։ Իսկ այն դեպքում, երբ առաջադրվել է մեկ թեկնածու, ընտրվում է դատավորների ընդհանուր թվի ձայների մեծամասնությամբ՝ 5 ձայնով: Քվեարկությունը փակ է։