Ձեր վստահելի աղբյուրը

Սահմանադրական աշխատակարգային նիստը լրատվամիջոցների կողմից տեսաձայնագրելու վերաբերյալ հարցը կրկին բարձրացվել է ՍԴ դատավոր Վահե Գրիգորյանի կողմից և իր իսկ կողմից բարձրացված հարցը հետ է վերցվել, քանի որ երեկ արդեն հարցին բավական մանրամասն անդրադարձ կատարվել էր: ՍԴ դիմաց լրագրողների հետ զրույցում ասաց ՍԴ դատավոր Արևիկ Պետրոսյանը:

Նա նշեց, որ լրատվությամբ որոշակի տեղեկատվություն էր տարածվել, որ ինքը դեմ է եղել, որ լրատվամիջոցների կողմից տեսաձայնագրվի նիստը:

«Դա չի համապատասխանում իրականությանը։ Ես սկզբունքորեն կողմ եմ եղել լուսաբանմանը։ Միաժամանակ նաև ներկայացրել եմ իմ դիտարկումները, որ ԶԼՄ-ների, ՍԴ դատավորների և աշխատակիցների մասնակցությունը նիստին, համավարակով պայմանավորված, պետք է առողջության անվտանգության հետ կապված լինի համապատասխան պաշտպանվածության շրջանակներում:

Եվ եթե պետք է հնարավորություն տանք, ապա պետք է հնարավորություն տանք բոլոր լրատվամիջոցներին՝ առանց սահմանափակման։ Այս պայմաններում Սահմանադրական դատարանի շենքի նիստերի մեծ դահլիճը վերանորոգման մեջ է, նաև պետք է  քննարկման առարկա դարձվի համապատասխան աշխատակարգային նիստն այլ վայրում անցկացնելու հարցը, որպեսզի բոլոր լրատվամիջոցները մասնակցություն ունենան»,- ասաց Ա. Պետրոսյանը։

ՍԴ դատավորի խոսքով, այս հարցադրումները կատարվել են, դրանց շրջանում պարոն Գրիգորյանը ևս գտել է, որ լրատվության բոլոր  միջոցների հավասար մասնակցությունն ապահովելու հետ կապված խնդիր կա։

Ա. Պետրոսյանը նաև նշեց, որ ՍԴ որոշ դատավորներ իրենց տեսակետներն անկաշկանդ ներկայացնելու, արտահայտելու հետ կապված լրատվամիջոցների ներկայությամբ կաշկանդման խնդիր էին տեսնում, այդ հանգամանքը նույնպես պետք է հաշվի առնել:

Հիշեցնենք, որ Սահմանադրական դատարանում երեկ կայացել էր  աշխատակարգային նիստ, որի օրակարգում էր Սահմանադրական դատարանի նախագահի ընտրության հարցը: Սակայն աշխատանքային օրվա ավարտով պայմանավորված՝ նիստը չէր ավարտվել: Այն շարունակվում է  այսօր: