Ձեր վստահելի աղբյուրը

Հայաստանի պետական տնտեսագիտական համալսարանում  ժամանակավորապես դադարեցված է ուսումնական գործընթացը: Տնտեսագիտական համալսարանի ուսումնական աշխատանքների գծով պրոռեկտոր Արմեն Գրիգորյանը լրագրողների հետ զրույցում ասաց, որ բաց քննարկման արդյունքում ուսանողությունն ու ՀՊՏՀ կոլեկտիվից ձևավորված կազմկոմիտեն որոշում կկայացանի հետագա քայլերի հետ կապված:

«Երկու տարի առաջ երկու ամիս բոլոր բուհերը չեն աշխատել՝ արդյո՞ք ոտնահարվել են ուսանողի կրթական իրավունքները, թե ոչ:  Դա այն պարագայում, որ չաշախելուց հետո ուսանողներից այդ երկու ամսվա վարձը ներառյալ գանձնվել է: Մենք երկու օր չենք աշխատում, հիմա մեզ հարց են տալսի՝ արդյո՞ք չենք ոտնահարում ուսանողերի շահերը»,- ասաց նա:

Ա. Գրիգորյանի խոսքով, ինքն էլ երկու տարի առաջ չի աշխատել, քանի որ կոնֆլիկտի լուծման հանգուցալուծման ճանապարհը համարել էր դա:

Ինչ վերաբերում է օրեր  առաջ կառավարության մոտ իրականացրած ակցիային ու կառավարության ներկայացուցչի հետ հանդիպմանը, պրոռեկտորն ասաց. «Կառավարության ներկայացուցիչը չէր: Դա էլ ենք դիտարկում ոչ այքան հարգալից վերաբերմունք համալսարանի նկատմամբ: Մեզ ընդունել է ուղղակի կառավարության բողոքների վարչության բաժիններից մեկի պատասխանատու աշխատողը, երբ բուհի 350 հոգանոց կոլեկտիվը 100-150 ուսանողի հետ միասին իջնում են կառավարության դիմաց իրենց բողոքն արտահատելու: Իսկ բողոքի էությունն է՝ եկեք օրենքները չխախտենք, գնանք օրենքով: Մենք ոչ մի այլ բան մեր կառավարությանը չենք ասում, այլ ասում ենք՝ եկեք օրենքները, օրենքներով սահմանված ընթացակարգերը չխախտենք»:

Նա նշեց, որ իրենց համար անհայտ է պատճառը, թե ինչու վարչապետը Դիանա Գալոյանին չի նշանակում ՀՊՏՀ ռեկտոր, որը հաղթել է մրցույթում:  Ըստ Ա.Գրիգորյանի, նոր մրցույթ հնարավոր չէ անցկացվել, քանի որ կա արդեն անցկացված մրցույթ, ընտրված ռեկտոր:

«Մինչև այդ գործողությունն օրենքով սահմանված կարգով ավարտական ակտին չհասցվի, եթե անգամ մտադրություն կա, որ Դիանա Գալոյանը չպետք է ռեկտոր լինի, պետք է նրան նշանակեն ու կարգադրեն,պարտադրեն, համոզեն որ հրաժարական տա:

Իրենք գիտակցում են, որ օրենքը մեր կողմն է, որովհետև այլ լուծում, բացի ընտրված մարդուն պաշտոնում նշանակելը, չկա: Կառավարություն անգամ հնարավորություն չունի քննարկել ու կայացնել այլ որոշում»,- ասաց Ա.Գրիգորյանը:

ՀՊՏՀ պրոռեկտորն ընդգծեց, որ իրենք քաղաքականության հետ կապ չունեն, իրենցմիակ պահանջն է՝ հուլիսի 17-ին «ՀՊՏՀ» ՊՈԱԿ ռեկտորի մրցույթի արդյունքների՝ օրենքով սահմանված կարգով հաստատումը:

Հայաստանի պետական տնտեսագիտական համալսարանի կոլեկտիվից ձևավորված կազմկոմիտե ավելի վաղ տարածել էր հայտարարություն, որում ասված էր. «Արդեն շուրջ 2 տարի է՝ Հայաստանի պետական տնտեսագիտական  համալսարանը ղեկավարվում է ռեկտորի պաշտոնակատարների կողմից։ 2020 թվականի մայիսին ՀՀ ԿԳՄՍ նախարարությունը վերջապես հայտարարեց «ՀՊՏՀ» ՊՈԱԿ-ի ռեկտորի թափուր պաշտոնի մրցույթ: Հուլիսի 17-ին կայացած մրցույթում «ՀՊՏՀ» ՊՈԱԿ խորհրդի անդամների ձայների 2/3-ով ՀՊՏՀ ռեկտորի պաշտոնում ընտրվեց Դիանա Գալոյանը: «Բարձրագույն և հետբուհական մասնագիտական կրթության մասին» ՀՀ օրենքի 15-րդ հոդվածի 4-րդ կետի համաձայն՝ ՀՀ Կառավարությունը հաստատում է ռեկտորի ընտրության արդյունքները, ինչը ընտրությունից ավելի քանի երկու ամիս անց դեռևս չի իրականացվել։ Այս իրավիճակը ավելի է խորացնում անորոշությունը, որը ստեղծվել է ՀՊՏՀ շուրջ՝ հանդիսանալով ճգնաժամի պատճառ»: