Ձեր վստահելի աղբյուրը

ԱԺ ԲՀԿ խմբակցության անդամ Նաիրա Զոհրաբյանն ասում է, որ իր հեռախոսը 24 ժամ գաղտնալսվում է, ամեն ինչ անում են իր և ԲՀԿ-ական պատգամավոր Գևորգ Պետրոսյանի նկատմամբ քրեական գործեր հարուցելու համար: Երևան քաղաքի ընդհանուր իրավասության դատարանի Կենտրոն նստավայրի դիմաց լրագրողների հետ զրույցում ասաց Նաիրա Զոհրաբյանը:

«Կանչում են մարդկանց, նաև Սյունիքում, որտեղ առաջադրվել էի ռեյտինգային թեկնածու,  փորձում են հասկանալ՝ ընտրությունների ժամանակ ես որևէ ընտրական մախինացիաների մեջ եղել եմ, թե ոչ: Նորից եմ ասում՝ չեմ բացառում, որ կհարուցեն քրեական գործ ինչ-ինչ ընտրական … չգիտեմ իրենց երևականությունը մինչև ուր կհերիքի, չգիտեմ այդ ինչ մահապարտներ կարող են գտնել, ովքեր իմ, Գևորգ Պետրոսյանի դեմ  ցուցմունքներ կտան: Դուք պատկերացո՞ւմ եք՝ ես և ընտրական կեղծիքը, այսինք՝ ինչ-որ մեկին գումար տամ, առաջարկեմ, որ ինձ ընտրե՞ն:
Հասկանում եք իրենց քայլերի աբսուրդը: Բայց ինչպես նշեցի, իրենք որևէ կարմիր գիծ չունեն, կոնկրետ հանձրարարական կա իրավապահների  վրա իմ, Պետրոսյանի դեմ գտնել, պեղել մարդիկ, մոնտաժել հեռախոսազրույցներ»,- ասաց Ն.Զոհրաբյանը:

Հարցին՝ ում կողմից է հանձնարարական, Նիկոլ Փաշիյանի՞, նա պատասխանեց. «Միանշանակ այո»:

ԲՀԿ-ական պատգամավորի համար մի բան է  զարմանալի. «Լավ չեն հասկանում, ինչպես նախկինները չէին հասկանում ու Փաշինյանն էր ասում՝ կորցրել եք իրականության զգացումը և ճիշտ էր ասում շատ դեպքերում, այդպես անբարո քայլերով, մտնելով ընտանիք… Անհարմար եմ զգում փակագծեր բացել, թե մինչև ուր են հասել, մինչև ուր են մտնում, մինչև ուր են պեղում, անձնական բնույթի տեղեկատվություն: Նպատակը լռեցնելն է, տարբեր գործիքներով պրեսինգ գործելն է:

Կարծում եմ՝ իմ նախկին գործընկեր Նիկոլ Փաշինյանը գոնե ինձ շատ լավ ճանաչում է: Իմ ընտանիքին նախապատրաստել եմ՝ եղեք պատրաստ ամեն ինչի, ամենակեղտոտ, խուլիգան հրապարակումների, որոնք իրենք անում են իրենց մի քանի կայքերով, որոշներն աշխատացնում են պատգամավորները, որոշները՝ գիտեք ովքեր են, նույնիսկ մոնտաժված վիդոսյուժեների:

Ասել եմ՝ պատրաստ եղեք ամեն ինչի, իմ ընտանիքը, հարազատները պատրաստ են, անգամ կալանավորելուց չեմ վախենում: Հանկարծ մտքներով չանցնի, որ ինչ-ինչ պրեսինգներով ինձ կարող են լռեցնել, հակաօրինական որևէ բան չենք անում:

Ինչպես ժամանակին Նիկոլ Փաշինյանը, որին համարել եմ լավ ընդդիմադիր պատգամավոր, խոսում էր իշխանության ձախողումների, հակաօրինական քայլերի մասին, որևէ մեկն իր հանդեպ գոնե այս կարգի քաղաքական հալածանք չէր իրականացում, չէին մտնում ընտանիք, անձնական կյանք, սրանք, ցավոք սրտի, անցել են բարոյական այդ սահմանը»:

Նա նշեց, որ չգիտի, թե ինչու է հենց ինքը թիրախում:

«Հաճախ ինձ հարցնում են՝ այդ թերթում աշխատել եք, ինչու եմ լռում: Ինչո՞վ ես կտարբերվեմ իրենից, եթե ես գործեմ իր մեթոդներով: Երբեք ինձ թույլ չեմ տալու խոսել այն ամենի մասին, ինչ  գիտեմ: Եթե մարդու համար բարոյականությունը, միասին անցած ճանապարհն առոչինչ է, ես տարբերվում են իրենից, ինձ համար կան տաբուներ, կա անցած ճանապարհ, կա ընտանիք, երեխաներ: Այդ տաբուներն իրենց համար չկան: Հենց դա է լինելու այն կործանման սկիզբը, որի վրա երկու ոտքով ամուր կանգնել են»,- ասաց Ն. Զոհրաբյանը:

Նրա խոսքով, այն, ինչ ինչ այսօր կատարվում է Գագիկ Ծառուկյանի, ԲՀԿ-ի հանդեպ, միանշանակ քաղաքական հաշվեհարդար է, երկու կարծիք լինել չի կարող, բայց ուզում է ակնկալել, որ դատավորները սթափ մարդիկ են: