Ձեր վստահելի աղբյուրը

«Ադրբեջանական քարոզչամեքենան այս ժամերին ամեն ինչ անում է՝ սեփական շահերից բխող լուրեր տարածելու համար։ Ես կուզեի, որ այստեղ հիմա ամրագրվեր, թե ի՞նչ կորուստներ է ունեցել հակառակորդը և ինչպիսի՞ կարուստներ ենք ունեցել մենք»,- ԱԺ հատուկ նիստի ընթացքում նման հարց հնչեցրեց ԱԺ «Լուսավոր Հայաստան» խմբակցության պատգամավոր Անի Սամսոնյանը՝ դիմելով ՀՀ վարչապետ Նիկոլ Փաշինյանին։

Պատասխանելով պատգամավորի հարցին՝ վարչապետ Փաշինյանն ասաց, որ մենք էլ ունենք էական կորուստներ, հակառակորդն էլ՝ շատ էական կորուստներ։ Այս պահին մարտական ծանր գործողություններ են ընթանում, զարգացող իրավիճակ է.

«Եվ քանի որ վիճակը զարգացող վիճակ է, առաջարկում եմ հետևել միայն պաշտոնական լրահոսին։ Ինչ վերաբերում է ռազմական դրությանը, ապա, թեև ես ասել էի, որ ընդհանուր զորահավաք է լինելու, այժմ մասնակի զորահավաք է կազմակերպվում»։

Արձագանքելով՝ Անի Սամսոնյանն հարցրեց՝ կա՞ տեղեկատվություն՝ այլ ճակատներից հարձակումներ և՞ս սպասվում են։

Ի պատասխան՝ Նիկոլ Փաշինյանը նշեց.

«Ռազմական դրություն հայտարարվում է այն ընթացքում, երբ հարձակման իրական վտանգ կա։ Բայց եթե ես հիմա ասեմ, թե ինչ ուղղությունների մասին կարող է խոսք լինել, նշանակում է, որ բացահայտում եմ մեր ունեցած տեղեկատվությունը, և դրա բացահայտմամբ կարժեզրկեմ այդ տեղեկությունները։ Թույլ տվեք չարձագանքել այդ հարցին՝ հասկանալով, որ այդ առումով իրավիճակը շատ լարված է և անկանխատեսելի»։