Ձեր վստահելի աղբյուրը

Ադրբեջանը լայնածավալ հարձակում է սկսել առաջնագծի երկայնքով, խորքում գտնվող բազմաթիվ բնակավայրերի ուղղությամբ ծանր հրետանի, օդուժ է կիրառել, հատկապես հարվածային անօդաչու թռչող սարքեր։ Ասուլիսում ասաց Արցախի Մարդու իրավունքների պաշտպան Արտակ Բեգլարյանը։

«Դրա հետևանքով բազմաթիվ վնասներ են եղել, կան քաղաքացիական անձանց շրջանում զոհեր՝ երկու զոհ,  վիրավորների առումով թվերը ճշտվում են, 30-ից ավելի վիրավոր կա քաղաքացիական բնակչության շրջանում, կարծում եմ թիվն անընդհատ մեծանալու է»,- ասաց նա։

Ա. Բեգլարյանի խոսքով, նախնական տվյալներով, ավելի քան 50 բնակավայր  թիրախի տակ է եղել ադրբեջանական հրետակոծությունների ու ԱԹՍ հարվածների ժամանակ, այդ բնակավայրերի մեջ ներառյալ բոլոր քաղաքները, խոշոր բնակավայրերը՝ Ստեփանակերտը, Շուշին, Մարտունին, Մարտակերտը, Հադրութը, Բերդձորը, բոլոր շրջկենտրոնները հարվածի տակ է եղել։

«Այս բնակավայրերը շատ հեռու են գտնվում ռազմական օբյեկտներից։  Ադրբեջանը չի կարող ասել, որ թիրախավորել են ռազմական օբյեկտները»,- ասաց Արցախի ՄԻՊ-ը։

Նա հայտնեց, որ փաստահավաք առաքելությունը համապատասխան փաստերը ճշտում է, օրերի ընթացքում ավելի հստակ կլինի, արտահերթ զեկույց կլինի՝ ներկայացնելով բոլոր փաստերը։

«Առնվազն այս պահի դրությամբ մի քանի հարյուր անշարժ գույք ու ենթակառուցվածքներ կան վնասված՝ ճանապարհներ, էլեկտրագծեր,  գազի խողովակներ, ջրատար խողովակներ, բավականին շատ բնակարաններ, մեքենաներ, ինչն ակնհայտ կերպով ցույց են տալիս, որ նպատակային ու հասցեական Ադրբեջանը թիրախավորել է քաղաքացիական բնակչությանը»,- ասաց Ա. Բեգլարյանը։

Ա. Բեգլարյանի խոսքով, այս գործողությունները միանշանակ միջազգային իրավունքի և միջազգային մարդասիրական իրավունքի կոպտագույն խախտումներ են, պետք է պատշաճ գնահատական ստանան միջազգային հանրության, խոշոր գերտութունների, միջազգային, իրավապաշտպան, միջկառավարական կազմակերպությունների կողմից։

«Իմ կոչն է միջազգային հանրությանը, որ առանց աչք փակելու հստակ կերպով արձանագրեն այս խախտումները, իրենց բոլոր լծակներով ազդեն Ադրբեջանի վրա, որպեսզի վերջ տան մարդու իրավունքների զանգվածային խախտումները։ Իհարկե,  Արցախի Պաշտպանության բանակը, հայկական Զինված ուժերը իրենցից կախված ամեն ինչ անում են, բայց այս ռազմական գործողությունները երկու կողմերի համար էլ հումանիտար մեծ աղետի պատճառ կարող են դառնալ, այդ աղետն այսօր սկսվել է»,- ասաց  Արցախի ՄԻՊ-ը։

Նա ընդգծեց, որ տարածաշրջանի կայունությամբ, խաղաղությամբ հետաքրքրված բոլոր ուժերն առավելագույնը պետք է անեն պատերազմական գործողությունները դադարեցնելու համար, համապատասխան իրավական ու քաղաքական գնահատական տան Ադրբեջանի գործողություններին։

«Ակնհայտ է՝ այս պահին բազմաթիվ ապացույցներ կան, ապագայում էլի կհրապարակեն, որ նախահարձակ կողմը Ադրբեջանն է եղել,  որքան էլ փորձեն, որ հակահարձակման են անցել,  բազմաթիվ ապացույցները հակառակի մասին են»,- ասաց Արցախի ՄԻՊ-ը։

Նա կոչ արեց իրավապաշտպան կազմակերպություններին, որ բավարար է՝  քաղաքականացված հիմքերով չեք ցանկանում անդրադառնալ Արցախի Հանրապետությանն ու այստեղ ապրող մարդկանց իրավունքներին, չեք ցանկանում այցելել Արցախ։

«Այս անտեսման պատճառով է, որ Ադրբեջանն իրեն ազատ է  զգում մարդու իրավունքների կոպտագույն խախտումներ անելու ճանապարհին։ Պետք է օր առաջ այցելեն Արցախ,  փաստահավաք առաքելություն իրականացնեն, ներկայացնեն միջազգային հանրությանը, թե ինչ է  կատարվում։

Սա ընդհանրապես քաղաքական հարց չէ, ամբողջությամբ մարդու իրավունքների հարց է,  միջազգային հանրությունը պատասխանատվություն է կրում խախտումների համար, քանի որ աչք է փակում խախտումների վրա, ներառյալ 2016 թվականի Ապրիլյանի ժամանակ մարդու իրավունքների զանգվածային խախտումների հանդեպ»,-ասաց Ա. Բեգլարյանը։

Հիշեցնենք՝  այսօր ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։