Ձեր վստահելի աղբյուրը

Ադրբեջանական զինված ուժերը լայնամասշտաբ հրետակոծությամբ, օդային միջոցների կիրառմամբ և ցամաքային զորքերով անցել են լայնամասշտաբ հարձակման՝ տարբեր հատվածներում, մարտական գործողություններնայս պահին էլ ընթանում են, բավականին թեժ են։ Ասուլիսում հայտարարեց ՀՀ ՊՆ ներկայացուցիչ Արծրուն Հովհաննիսյանը։

Նա նշեց, որ հակառակորդը շատ տեղերում հետ է շպրտվել՝ կրելով զգալի կորուստներ, հացրել  է հրթիռային և ավիացիոն, հրետանային հարվածներ պաշտպանության բանակի զորամասերի տարբեր տեղակայման  նշանակության օբյեկտներին, կան որոշակի ավերածություններ, կորուստներ,  դրանք հիմնականում չինչն են։

Ա. Հովհաննիսյանն ասաց, որ կոնկրետ թվագրական տվյալներ կներկայացնեն լրացուցիչ։

Խոսելով հայկական կողմի տեխնիկայի, կենդանի ուժի կորուստների մասին, նա նշեց,  քանի որ մարտեր են ընթանում ու բավականին ինտենսիվ, կոնկրետ կորուստներ ամփոփիչ տվյալներով չեն կարող ներկայացնել, սխալվելու հավանականությունը կա։

«Քանի որ մարտերն ինտենսիվ են, խոսել այն մասին, որ ընդհանրապես կորուստներ չենք ունենա կամ չունենք, մի քիչ ճիշտ չի լինի»,- ասաց Ա. Հովհաննիսյանը։

Հարցին՝ Արցախի ուղղությամբ վարված հրթիռահրետանային կրակը ի՞նչ զինատեսակներից է վարվել, ՊՆ ներկայացուցիչն ասաց, որ այս պահին ճշտումներ են կատարում, բայց հավաքագրած տարբեր տեղեկությունների, նյութերի համաձայն, ըստ էությամբ, բացառությամբ մեկ-երկու ամենամեծ տրամաչափի հրթիռային միջոցներից, Ադրբեջանը կիրառել է բոլոր միջոցները, այդ թվում ավիառումբեր, ԱԹՍ-ներ, ինքնաթիռներ, ուղղաթիռներ և այլն։

Պատասխանելով հարցին, թե հայկական կողմը չի՞ քննարկում մեր ձեռքի տակ ունեցած միջոցները կիրառելու հարցը, Ա. Հովհաննիսյանը նշեց, որ Զինված ուժերի հրամանատարությունը, երկրի ռազմաքաղաքական ղեկավարությունը լիովին վերահսկում են իրավիճակը, տիրապետում, իրականացում ԶՈւ լիարժեք ու ամբողջական կառավարում, ըստ անհրաժեշտության բոլոր այն զինատեսակները, որոնք նպատակահարամար կգտնվեն տվյալ մարտական իրավիճակում կիրառելու, վստահաբար, կկիրառվեն։

Նա հայտնեց, որ շենք-շինությունների զգալի ավերածություներ կան Արցախի առանձին փոքր բնակավայրերում, նաև Ստեփանակերտում։

Ինչ վերաբերում է Ադրբեջանի կողմից նախապես պլանավորած լինելու մասին, նա նշեց, որ Ադրբեջանն այս ամեն ինչը պլանավորել էր մանրակրկիտ, հնարավոր չէ մեկ օրում, մեկ ժամում օպերացիա պլանավորել, լրագրողին մեկ րոպեում հասցնել առաջանագիծ։

«Գործողությունների հետ զուգահեռ ադրբեջանական պաշտոնական լրահոսում համապատասխան հայտարարություններ հայտնվեցին իբր հայկական կողմը համապատասխան սադրանք է կատարել, իրենք իբր պատասխանում են։ Բայց մեր մասնագետների, գործընկերների կողմից ներկայացվեցին բազում փաստեր՝ սկսած օրեր առաջ ադրբեջանական լրահոսում երևացող տարատեսակ պլանավորված գործողությունների վերաբերյալ, Թուրքիայի և Ադրբեջանի օդային հաղորդակցության նյութերի վերաբերյալ, այսօր առավոտյան անմիջապես գործողություններից րոպեներ անց ադրբեջանական ու թուրքական լրատվամիջոցների ինտենսիվ աշխատանքը բուն մարտական գործողությունների շրջանից, դրանից հետո Ադրբեջանի պաշտոնական հաղորդագրություններն այն մասին, թե իբր մեր գործողություններից հետո անցնում են լայնամասշտաբ հակահարձակողական օպերացիայի։

Այս ամեն ինչը գալիս է ապացուցելու, որ Ադրբեջանն այս ամեն ինչը պլանավորել էր մանրակրկիտ։ Այդ ամեն ինչը հնարավոր չէ թաքցել, ապացույցները բազում են, մեր գործընկերները միջազգային հարթակներում, լրատվամիջոցները, աշխատում են, այդ փաստերը կհավաքենք ու ամբողջական կներկայացնեք, թե իրականում Ադրբեջանն ինչպես է դա սկսել»,- ասաց նա։

Հարցին՝ սեպտեմբերի 21-ին արդեն սահմանային որոշակի հատվածներում կուտակումներ կային, այսինքն այս հարձակումն այնքան էլ անսպասելի չէր, արդյո՞ք վիճակն այնքան ծայրաստիճան է, որ զորահավաքի նպատակ կա, Ա. Հովհաննիսյանն ասաց.

«Վիճակը ծայրաատիճան, ոչ ծայրաստիճան գնահատել պետք չէ։ Զորահավաքը ռազմական դրության, Պաշտպանության մասին օրենքի կետերով ամրագրված իրավական գործառույթ է։ Պատերազմը վարում է պետությունը, Զինված ուժերն ունի որոշակի խնդիրներ, համալրվածությունը ԶՈւ բնականոն պրոցես է։ Գործողությունները, մասշտաբը, այնքան փոքր չեն, տեղային չեն, լոկալ չեն, բայց եթե կառավարման համակարգը հստակ աշխատում է՝ ռազմաքաղաքական ղեկավարությունից մինչև դասակի ու ջոկի հրամանատար, եթե գտել են, որ պետք է սա այսպես իրականացվի, նշանակում է մեր պատկերացումներն այդ ուղղությամբ են գնում։ Սա վիճակի հետ մի կապեք։ Վիճակը շատ լավ է, Զինված ուժերն իրենց խնդիրը կատարում են փայլուն, եթե նույնիսկ կորուստներ ունենք, բայց պատերազմում առանց կորուստների չեն լինում, հակառակորդին զսպում ենք և իր խնդիրները տապալվում են»։