Ձեր վստահելի աղբյուրը

«Մենք տարբեր «զենքեր» ունենք, և չպետք է դրանք միանգամից կրակենք։ Այս պահին անում ենք հայտարարություն, որով կոչ ենք անում միջազգային հանրությանը՝ համարժեք արձագանքել Ադրբեջանի սանձազերծած ագրեսիային»,- խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Նրա խոսքով, եթե կարիք լինի, նաև այլ «զենքեր» կկիրառվեն։ Ըստ պատգամավորի, տարբեր խողովակներով այժմ միջազգային հանրությունը տեղեկանում է, որ Հայաստանում նման քննարկում է տեղի ունենում, ինչն էլ իր արձագանքը կունենա։

Հարց. Իսկ ի՞նչ հետևանքներ կարող են ունենալ այս քննարկումները։

Է. Մարուքյան. Գիտեք, հետևանքների առումով պետք է այն ժամանակ խոսել, երբ կա մեծ պատերազմի վտանգ։ Բայց մենք հիմա արդեն պատերազմի մեջ ենք, և մեծ հաշվով, էլ բան չունենք կորցնելու։ Շատերն ասում են, որ պետք է քննարկվի Արցախի անկախության հարցը, շատերն ասում են, որ պետք է այն միավորվի Հայաստանին։ Բայց մենք բոլորս էլ հասկանում ենք՝ ինչի մասին է խոսքը և որն է վերջնանպատակը։ Վերջնանպատակը մեր հայրենիքի դե յուրե միավորումն է։ Բայց հիմա մենք մեր անելիքն արդեն այդ մասով արել ենք, ուղերձները հղված են և հասել են իրենց համապատասխան հատվածներին։

Հարց. Միջազգային հանրության արձագանքներ եղե՞լ են Ձեր ուղարկած նամակներին։

Է. Մարուքյան. Մեր նամակները տեղ են հասնում, անցած անգամ՝ հուլիսին էլ են տեղ հասել, Ապրիլյանի ժամանակ էլ են տեղ հասել։ Սա ուրիշ աշխարհ է, քաղաքակրթությունների բախման աշխարհը չի։ Սա ուժեղների աշխարհ է, և այն հետևում է՝ որ ազգը կարողանում է իր ինքնասիրությունը պաշտպանել, իր հողի վրա իր կյանքի իրավունքը կարողանում է պահպանել, նրան էլ հարգում են։ Հիմա մենք ինքներս մեր իրավունքները պետք է պաշտպանենք, ինչը և անում ենք։ Իսկ ուղարկված նամակները միջազգային սոուս են ստեղծում մեզ համար։ Նախ, այստեղ հաստատված փաստ է, որ Ադրբեջանն է հարձակվել, սա միջազգային դիվանագիտական աշխատանքի արդյունք է։ Միջազգային էքսպերտները փաստում են, որ Ադրբեջանն է սադրանքի դիմել և պատերազմ սկսել՝ դրսևորելով ագրեսիա։

Հարց. Իսկ իշխանությունների վարած քաղաքականությունը կապ ունի՞ ստեղծված այս իրավիճակի հետ։

Է. Մարուքյան. Հայաստանում հայտարարված է ռազմական դրություն, և մենք մեր բոլոր քաղաքական անհամաձայնությունները մի կողմ ենք դրել։ Չեմ կարող քաղաքական վերլուծություններ ու գնահատականներ տալ։ Ես հիմա զինվոր եմ ու կատարում եմ հրամաններ։

Հարց. Ապրիլյան պատերազմից հետո էլ մենք մարդու իրավունքների կոպիտ խախտման հետ կապված պետք է իրավական գործընթաց սկսեինք, բայց ոչ մի բան չեղավ դրանից հետո։ Հիմա ի՞նչ է արվելու, եթե անգամ միջազգային էքսպերտները գիտեն, որ Ադրբեջանն է պատերազմը սկսել։

Է. Մարուքյան. Հիմա չեմ ուզում հիշել, թե ինչ հանդիպում ունեցանք ԱԳՆ-ում, ինչ էինք ասում, իրենք ինչ էին պատասխանում։ Եվ դա է պատճառը, որ Ադրբեջանի հանցագործ էլիտան շարունակում է իրեն անպատիժ զգալ։ Եվրոպական դատարան գործեր մուտքագրվեցին, որոնք անհատական՝ զոհերի հարազատների կամ տարբեր իրավաբանական կառույցների կողմից մուտքագրվեցին, բայց պետական մակարդակով մենք այդ իրողությունը նորմալ չօգտագործեցինք։  Եթե այսօր էլ հետևողական չլինենք, ապա նույնն է շարունակվելու։ Ես կարծում եմ, որ հիմա Ապրիլյան պատերազմի դոսյեներն էլ պետք է բարձրացվեն։ Մենք փաստեր ունենք, որ զինվորներին գլխատել են, դիակապտություն է տեղի ունեցել, խաղաղ բնակիչներ են սպանել։ Սրանք միջազգային քրեական հանցագործություններ են՝ ուղված մարդկության դեմ։