Ձեր վստահելի աղբյուրը

«Օրվա ընթացքում շարունակվել են համառ մարտերը՝ գրեթե սահմանի ողջ երկայնքով, մասնավորապես թեժ են եղել հյուսիսային և հարավային ուղղությունները։ Հայկական բանակի ստորաբաժանումները, վարելով թեժ մարտեր, արձանագրել են շեշտակի, զգալի հաջողություններ»,- ասուլիսում ասաց ՀՀ պաշտպանության նախարարության ներկայացուցիչ Արծրուն Հովհաննիսյանը։

Նա նշեց, որ օրվա ընթացքում խոցել են Ադրբեջանի բազում քանակի զրահատեխնիկա, ԱԹՍ-ներ, կենդանի ուժ։

ՊՆ ներկայացուցչի ներկայացրած տվյալներով, ընդհանուր առմամբ, պատերազմի սկսվելու առաջին պահից ի վեր՝ Ադրբեջանը կորցրել է կենդանի ուժ՝ 790 զինծառայող, որից 180-ը՝ Քարվաճառի ուղղությամբ, որտեղ ընթացել են բավականին համառ և դժվար մարտեր։ Մոտավոր տվյալներով, կա 1900 վիրավոր՝ Ադրբեջանի բոլոր ստորաբաժանումներում միասին վերցրած։

Նրա խոսքով, հայկական Զինված ուժերի ստորաբաժանումները հակատանկային և հրետանային միջոցներով խոցել է հակառակորդի 137 տանկ և զրահատեխնիկա, ոչնչացվել է հակառակորդի 72 ԱԹՍ, 7 ուղղաթիռ, 1 ինքնաթիռ։

«Այսպիսով, մարտերը շարունակվում են, մեր Զինված ուժերը հստակ կատարում են իրենց մարտական խնդիրները, հակառակորդի բոլոր հարձակողական գրոհները, փորձերը  հետ են մղվում համապատասխան կորուստներ պատճառելով»,- ասաց Ա.Հովհաննիսյանը։

Նա նշեց, որ այսօր աննախադեպ էր այն իմաստով, որ հարձակման ենթարկվեց Հայաստանի Վարդենիսի տարածաշրջանը՝ ավիացիոն և հրթիռային, օդային հարձակման այլ միջոցներից, մասնավորապես մարտական ԱԹՍ-ներից։

«Թուրքական ռազմաօդային ուժերին պատկանող F-16 կործանիչները, որոնց մասին բարձրաձայնվել էին մեր կողմից, գտնվում էին երկար ժամանակ Ադրբեջանի տարածքում և առաջին իսկ օրվանից մասնակցել են ադրբեջանական օդուժի և այլ հարձակողական միջոցների գործողությունների համակարգմանը, այսօր խոցել են ՀՀ ռազմաօդային ուժերին պատկանող ՍՈւ -25 կործանիչը, օդաչուն մահացել է։

Ադրբեջանը շտապեց հերքել, ընդ որում շատ ծիծաղելի, անհնարամիտ բառապաշարով ՝ նշելով,  որ նման ինքնաթիռ ադրբեջանական ռազմաօդային ուժերի սպառազինության մեջ չկա։ Մենք շատ լավ գիտենք, որ դա Ադրբեջանի ռազմաօդային ուժերին չեն պատկանում, պատկանում են Թուրքայի ռազմաօդային ուժերին և այդ մասին շատ հստակ նշեցինք»,- ասաց Ա. Հովհաննիսյանը։

Նա ընդգծեց, որ որևէ մեկի մոտ որևէ խուճապ չկա, ամեն ինչ հստակ կառավարվում է, երկրի ռազմաքաղաքական ղեկավարությունը, ԶՈւ ղեկավարությունը, տեղի հրամանատարները, ինքնակառավարման մարմիները ամեն ինչ հստակ  վերահսկում և իրականացնում են։

Դիրքերի կորստի մասին հարցին  ի պատասխան՝ ՊՆ ներկայացուցիչն ասաց. «Խնդրում եմ՝ դիրքերի առանձին կորուստների, ձեռքբերումների մասին առանձնահատուկ անդրադարձ չկատարել։ Մենք կարող է ունենանք  ինչ-որ դիրք վերացրած, ինչ-որ դիրք հանձնած, դա բացարձակ էական չէ։ Այս պատերազմն առանձին դիրքերի պատերազմ չէ, սա ավելի մեծ նշանակության պատերազմ է»։