Ձեր վստահելի աղբյուրը

«Ես համոզված եմ, որ Թուրքիայի ռազմական խորհրդականները մասնակցում են այս գործողություններին։ Ենթադրում եմ, որ թուրքական անօդաչու սարքերը, որոնք այսօր օգտագործվում են մեր դեմ Արցախում և ՀՀ տարածքում, դրանք ամենայն հավանականությամբ կառավարվում են թուրք օպերատորների կողմից»,- մամուլի ասուլիսի ժամանակ հայտնեց ռազմական փորձագետ Կարեն Վրթանեսյանը։

Նրա խոսքով, քանի որ ԱԹՍ-ները 1-2 ամիս է ինչ տեղափոխվել են Ադրբեջան, ապա քիչ հավանական է, որ ադրբեջանցի օպերատորները սովորեին դրանք օգտագործել:

Նա հավանական համարեց, որ որ թուրք մասնագետներն են աշխատացնում դրանք և չբացառեց, որ Թուրքիայի հատուկ ջոկատայինները մասնակցեն ինչ-ինչ դիվերսիոն գործողությունների:

«Առավել ևս, որ Ադրբեջանի հատուկ ջոկատայինները վերապատրաստություն են անցնում Թուրքիայում և համատեղ մի քանի զորավարժություններ են անցկացրել»,- նշեց փորձագետը:

Կարեն Վրթանեսյանը հիշեցրեց, որ 100 տարի առաջ՝ 1920 թվականի այս օրերին սկսվեց հայ-թուրքական պատերազմը, բայց պատմական սինվոլիզմ դրա մեջ չի փնտրում:

Ըստ նրա, Թուրքիան հրահրելով բախումներ երկու խնդրի է լուծում, առաջինը՝ Էրդողանի վարկանիշի հարցն է լուծում, քանի որ այն ընկել էր կորոնավիրուսով պայմանավորված տնտեսական անկմամբ, որտեղ  շատ լուրջ կորուստներ է ունեցել: Վրթանեսյանը համոզված է, որ Էրդողանն այդ խնդիրն է լուծում նաև, երբ փորձում է իրեն ցույց տալ  որպես նոր օսմանյան սուլթան, որը փորձում է վերականգնել այն կայսրության փառքը:

«Կարծում եմ, որ այս քայլով Էրդողանը Ռուսաստանի համար ստեղծում է նոր ճակատ, որպեսզի անհրաժեշտության դեպքում որպես խաղաքարտ այն օգտագործի Ռուսաստանի հետ հարաբերություններում, օրինակ՝ Լիբիայում և Սիրիայում բանակցելիս»,- հայտնեց Վրթանեսյանը:

Նա համոզմունք հայտնեց, որ թուրքերն ու ռուսները աշխարհում մի քանի տեղ կռվում են իրար դեմ:

«Մի կողմից ՌԴ-ն հակաօդային պաշտպանության համակարգեր է վաճառում Թուրքիային, կամ ատոմակայան է կառուցում, գազ է մատակարարում,  բայց մյուս կողմից, օրինակ, ռուսական մասնավոր ռազմական ընկերությունների մարտիկները կռվում են նմանատիպ թուրք մասնագետների, մասնավոր զինվորականների, իսկ Լիբիայում և Սիրիայում նաև պետական զորքերի դեմ»,- նկատեց փորձագետը:

Նա գտնում է, որ Թուրքիան փորձում է նոր պրոբլեմներ ստեղծել Ռուսաստանի սահմանի մոտ, որպեսզի հետո օգտագործի ՌԴ-ի դեմ:

Վրթանեսյանի խոսքով, չնայած Իլհամ Ալիևի վարկանիշի խնդիրն էլ կա, բայց այս անգամ պատերազմում ուզում են ռազմական ուժով ԼՂՀ-ն գրավել:

Փորձագետը հայտնեց, որ Նախիջևանում Ադրբեջանն ունեն 15 հազար զինծառայողով առանձին բանակ և սահմանապահ դիվիզիա և չբացառեց, որ Հայաստանում իրավիճակի լարման դեպքում կփորձեն նաև Նախիջևանից հարվածել: