Ձեր վստահելի աղբյուրը

«Հրապարակ» թերթը գրում է. «Չնայած ԲՀԿ-ի հայտարարություններին, որ ներքաղաքական որևէ օրակարգ այս պահին առաջ չեն բերելու, Նաիրա Զոհրաբյանը պնդում է, որ իշխանությունը շարունակում է իր դեմ պայքարը՝ կեղտոտ մեթոդներով: Ֆեյսբուքյան մի օգտատեր նախկին վարչապետ Բագրատյանի լուսանկարն է տեղադրել ու գրել. «Սրան, մեկ էլ Զոհրաբյան Նառային նստեցրեք «Իսկանդերի» վրա ու կրակեք Բաքու»: Զոհրաբյանն ասում է՝ դա ֆեյք է, բայց «ըստ օդում կախված լուրերի՝ իմքայլական պատգամավոր Արփի Դավոյանն է», ով իր դեմ կոնկրետ հանձնարարականով աշխատում է. ԱԱԾ-ն պարբերաբար տրամադրում է անպարկեշտ ապատեղեկատվություն իր մասին, որոնցից մեկի հետ կապված՝ պատերազմի ավարտին, ինքը պարզաբանում կտա՝ ձայնագրությունների մասով։

«Ես և ԲՀԿ-ն շարունակում ենք հավատարիմ մնալ մեր խոսքին՝ այս փուլում որևէ քաղաքական ուժի հետ որևէ հակամարտության մեջ չմտնելու հարցում, որովհետև այս փուլում ունենք մեկ թշնամի՝ Ադրբեջանն է»։ Նրա կարծիքով՝ խնդիր է դրված իրեն հավասարակշռությունից հանել, բայց չի ստացվելու. «Հույս ունենք, որ պատերազմը կավարտվի մեծ հաղթանակով, որից հետո կսկսվի իրավական գործընթաց ֆեյքերի անվան տակ թաքնված իմքայլական պատգամավորների և տարբեր գործիչների հանդեպ: Ցավոք սրտի, այս մարդիկ չեն հասկանում իրական վտանգի չափը և շարունակում են իրենց նեղ անձնական, ճղճիմ հաշվեհարդարները»:

Իսկ նշված գրառումը հայտնվեց ԵԽԽՎ պահպանողականների և ռեֆորմիստների քաղաքական խմբի հայտարարությունից հետո, երբ իշխանություններին կոչ արեցին՝ դադարեցնել իր հանդեպ տեղեկատվական տեռորը: «Այս գրառումով իշխանություններն ասում են, որ մենք թքել ենք ի պաշտպանություն ձեզ եվրոպական բոլոր նախաձեռնությունների վրա... մենք շարունակելու ենք չարձագանքել նման հայտարարություններին»»։

Մանրամասները թերթի այսօրվա համարում։