Ձեր վստահելի աղբյուրը

Արցախի սահմանին ամբողջ գիշեր ընթացել են համառ մարտեր: Ասուլիսում ասաց ՀՀ ՊՆ ներկայացուցիչ Արծրուն Հովհաննիսյանը: Նա նշեց, որ Ադրբեջանը զրահատեխնիկայի, ԱԹՍ-ների, հրետանու հուժկու կրակի տակ փորձել է նորից հարձակումներ իրականացնել հատկապես հյուսաիային և հարավային ուղղություններով, կրելով մեծ կորուստներ՝ մոտ 60 զինծառայողի և զգալի թվով զրահատեխնիկա, հետ է շպրտվել: ՊՆ ներկայացուցչի խոսքով, այս պահին մարտերը շարունակվում են:

Ա. Հովհաննիսյանն ասաց, որ դեռ երեկ ՀՀ տարածքը ենթարկվել էր ադրբեջանական Զինված ուժերի գործողություններին, հատկապես այսօր Վարդենիսի ուղղությամբ ադրբեջանական ԱԹՍ-ներն ու օդուժը հարված են հասցել:

«ԱԹՍ-ներ հարված են հասցրել նաև  նաև խաղաղ բնակիչներին, օդուժ է կիրառվել հայկական Զինված ուժերի մարտական դիրքերի ուղղությամբ: Այս պահին այս ուղղությամբ կորուստներ չունենք: Մարտերը շարունակվում են»,- ասաց նա:

Ա. Հովհաննիսյանի խոսքով, իրավիճակն արագ է փոփոխվում:

Նա նշեց, որ այս պահին նախնական տեղեկություններով, վիրավոր էլ չկա, ընթացքում ավելի ճշտված տվյալներ կհաղորդեն:

ՊՆ ներկայացուցիչն ասաց, որ առաջին օրը, երբ Ադրբեջանը հասցրեց մասսայական օդային և հրթիռահետանային հարված, այդ օրն էլ Վարդենիսի ուղղությունը թիրախավորվել էր:

«Ճակատ բացելու մասին խոսակցությունը նոր չէ, առաջին իսկ օրվանից այս ճակատն օգտագործվել է իրենց կողմից:

Փաստացի Հայաստանի Հանրապետության տարածքը թիրախավորվել է հենց առաջին րոպեից և սա նորություն չէ: Մեր Զինված ուժերը բոլոր ուղղություններով, ներառյալ նախիջևանյան ուղղությունը, լիովին կազմ պատրաստ են, մարտունակ իրենց խնդիրները կատարելու համար»,- ասաց Ա. Հովհաննիսյանը:

Նա նշեց, որ Նախիջևանի կողմից իրավիճակը համեմատաբար հանդարտ է, զգոնությունը պահում են. «Դժվար է ասել, ընդհանրապես ինչ կարող է տեղի ունենալ: Եթե Հայաստանի Հանրապետությունը թիրախավորվել է, արդեն երկրորդական է այս կամ այն ուղղությունը»:
Նրա խոսքով, նման լայնամասշտաբ պատերազմի ժամանակ մեկ-երկու դիրք վերցնելը, տալը, ընդհանրապես մարտավարական որևէ բան իրենից չի ներկայացնում, կարևորը Զինված ուժերի ընդհանուր մարտական խնդիրները կարտարելու կարողությունն է, մարտունակությունն է, կառավարաման հստակ համակարգն է, մարտական ոգին է:

«Գրագետ են աշխատում հայկական բանակի Զինված ուժերը, հատկապես հրետանավորները, դիպուկ են խոցում, հստակ են կառավարում կրակը»,- ընդգծեց ՊՆ ներկայացուցիչը:

Նա նշեց, որ Բաքուն րոպեներ առաջ ապատեղեկատվություն է տարածել իբրև բարձրաստիճան զինվորականների կորստի, Մարտունի զորամասի ամբողջական ոչնչացման մասին, ինչն իրականությանը չի համապատասխանում:

«Հայտարարությունն անգամ խոսում է ներկայացված ցածր որակի, ցածր մակարդակի զինվորական գիտելիքների մասին: Իրենք նշել են՝ զորամասն ամբողջովին ոչնչացված է: Այդպիսի բան չկա, այդպիսի բան շատ չի էլ լինում:

Հասկանալով, որ կրում են պարտություն, պլանները չեն իրականանում, ունեն չափազանց մեծ կորուստներ, մենք էլ ունենք կորուստներ, բայց անհամադրելի են, դրա համար փորձելու են մշտապես իրենց հասարակությանը կերակրող նյութեր հորինել»,- ասաց Արծրուն Հովհաննիսյանը:

Նա նշեց, որ պահեստազորայինները դեռևս ներգրավված չեն պատերազմում. «Այնպես չէ, որ նրանց տարվում ու անմիջապես մարտի են նետվում։ Մեր Զինված ուժերը հրատապ նման խնդիր չունի: Մեր Զինված ուժերը իր մարական խնիդիրները հստակ կատարում է, պահեստազորի ներգրավուծությունն ունի հատուկ ընթացակարգ՝ որոշակի ժամանակ հետո, որոշակի խնդիրներով»: