Ձեր վստահելի աղբյուրը

«Արդեն 48 ժամից ավելի է՝ Ադրբեջանը չի կարողանում գրանցել նախատեսված հաջողությունները: Սա նշանակում է, որ Ադրբեջանը լուրջ օգնության կարիք ունի»,- ասուլիսում ասաց ադրբեջանագետ Արմինե Ադիբեկյանը:

Նրա խոսքով, Թուրքիան կարող է զորքային օգնություն էլ ցուցաբերել, քանի որ Էրդողանը Ալիևին պաշտոնապես խոստացել է, որ նրանք Ադրբեջանին կմատուցեն ցանկացած ծավալի, որակի քանակության օգնություն, որն Ադրբեջանը կցանկանա:

«Եթե Ադրբեջանը խնդրի զորքային աջակցություն, հավանաբար, Թուրքիան դա կտրամադրի: Բայց կարևոր նոուանս կա՝ ոչ թե որպես Թուրքիայի զորք, այլ իր զինվորներին կհագցնի ադրբեջանական ռազմազգեստ ու կուղարկի պատերազմի: Սա կարևոր է, քանի որ Թուրքիան դժվար թե ռիսկ անի մտնի Հայաստան իր դրոշի  տակ»,- ասաց Ա. Ադիբեկյանը:

Նա հիշեցրեց, որ 2016 թ. Ապրիլյան պատերազմից հետո Յուրի Խաչատուրովն ասել էր՝  «մենք ադրբեջանական բանակին հասցրել ենք այնպիսի  վնաս, որ նրանցից  կպահանջվի 4-5 տարի, որ կարողանան այդ վնասը վերականգնել», ու այդպես էլ եղավ, անցել է 4,5 տարի, Ադրբեջանն իր վնասները վերականգնել է և ռազմական գործողություններ սկսելու համար հարմար ժամանակ էր:

«Հիմա կորոնավիրուս է, սահմանները փակ են, աշխարհը զբաղված է լրիվ ուրիշ խնդիրներով, իսկ Ադրբեջանն իրեն այնքան ուժեղ էր զգում, գումարած Թուրքիայի խոստացած աջակցությունը:  Կան տեսակետներ, որ Ալիևն, այսպես ասած, Թուրքիայի պատվերն է  կատարում, քանի որ Թուրքիային այստեղ պետք էր ռազմական գործողություն հրահարել, որպեսզի այլ խնդիրներից աշխարհի ուշադրությունը շեղի»,- ասաց ադրբեջանագետը:

Ա.Ադիբեկյանը նշեց, որ դեռ սեպտեմբերի 21-ին էր Իլհամ Ալիևը հայտարարել՝ բանակցելու բան չունեն, տարածքները պետք է հետ տան, հակառակ դեպքում պատերազմ է սկսում:

«Սա է եղել նրա խոսքը: Նա ոնց ասել է, այդպես էլ եղել է: Իսկ դիվանագիտությունն այդ պահին ո՞ւր էր: Այնպես որ հիմա դիվանագիտականով չգիտեմ ինչ կարող է լինել: Հավանաբար, ոչինչ: 48 ժամ է բոլորը պահանջում են վերադառնալ բանակցային սեղան, հրադադար, բայց ոչ մի վայրկյան անգամ չի նվազել այդ գրադուսը: Հետևաբար, եզրակացնում եմ, որ դիվանագիտական խողովակներով առայժմ ոչ մի արդյունքի չի լինի հասնել»,- ասաց ադրբեջանագետ Արմինե Ադիբեկյանը:

Հիշեցնենք՝  սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։ Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը: Բնակչությանը կոչ է արվել պատսպարվել։