Ձեր վստահելի աղբյուրը

ՌԴ Պետդուման այսօր ընդունել է հայտարարություն Լեռնային Ղարաբաղում տիրող իրավիճակի վերաբերյալ, որում երկու կողմերին էլ կոչ է անում դադարեցնել կրակը և պատրաստակամություն է հայտնում տրամադրել միջնորդական օգնություն՝ խաղաղ կարգավորման համար: Այս մասին գրում է Tass-ը։

Մասնավորապես, ռուս պատգամավորները «լուրջ մտահոգություն են հայտնում Լ Լեռնային Ղարաբաղի հակամարտության գոտում իրավիճակի կտրուկ սրման կապակցությամբ, որը հանգեցրել է բազմաթիվ զոհերի, և խստորեն դատապարտում են կողմերի կողմից ուժի գործադրումը»:

«Պետդուման հայտարարում է անհապաղ հրադադարի, տարածաշրջանում առճակատման սրման կանխման անհրաժեշտության և իրավիճակի խաղաղ կարգավորմանն այլընտրանքի բացակայության մասին։  Պետդումայի պատգամավորները կոչ են անում կողմերին շուտափույթ վերադառնալ բանակցային գործընթացին և պատրաստ են տրամադրել միջնորդական օգնություն՝ իրավիճակի կայունացման համար», - ասվում է տեքստում:

Նշենք, որ ԱԺ պատգամավոր Միքայել Մելքումյանն էլ իր էջում գրել է, որ քիչ առաջ Ռուսաստանի Դաշնության Դաշնային ժողովի Պետական դուման ընդունեց Լեռնային Ղարաբաղի կոնֆլիկտի կողմերի կողմից ուժի կիրառման անթույլատրելիության և կրակի անհապաղ դադարեցման անհրաժեշտության մասին հայտարարությունը՝ 363 կողմ ձայներով՝ միաձայն:

«Հենց նոր ինձ հետ կապվեց Ռուսաստանի Դաշնության Դաշնային ժողովի Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովը, ով արձանագրեց, որ զանգահարում է Ռուսաստանի Դաշնության Պետական դումայի խոսնակ Վյաչեսլավ Վոլոդինի հանձնարարությամբ և ընդունված հայտարարության բովանդակության մասին տեղեկացնում է Հայաստանի Հանրապետության Ազգային ժողովի և Ադրբեջանի Միլի մեջլիսի համապատասխան պաշտոնատար անձանց»,-գրել է Մելքումյանը:

Հիշեցնենք, որ սեպտեմբերի 27-ին, վաղ առավոտյան Ադրբեջանը խախտելով հրադադարի ռեժիմը, Լեռնային Ղարաբաղի սահմանագծի ողջ երկայնքով նախաձեռնել է լայնածավալ ռազմաօդային և հրետանային ագրեսիվ հարձակումներ։ Ադրբեջանի ագրեսիվ գործողությունների արդյունքում կան տասնյակ զոհեր։