Ձեր վստահելի աղբյուրը

Ֆրանսիայի նախագահ Էմանուել Մակրոնը պլանավորում է հեռախոսային բանակցություններ վարել ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի հետ՝ քննարկելու Լեռնային Ղարաբաղում իրավիճակի կարգավորման ուղիները: ՏԱՍՍ-ի փոխանցմամբ, այս մասին նա ասել է չորեքշաբթի օրը Լատվիա կատարած այցի ընթացքում կայացած մամուլի ասուլիսում:

«Այս խնդրով զբաղվում է միջնորդների միջազգային իրավասու խումբը՝ Մինսկի խումբը, որի մեջ մտնում են Ֆրանսիան, Ռուսաստանը և ԱՄՆ-ը: Հակամարտության սրման առաջին ժամերից մենք մեր գործընկերների հետ կապի մեջ ենք և արտգործնախարարների և իմ մակարդակով: Այս երեկո ես նախատեսում եմ այս թեմայով խոսել Նախագահ Պուտինի հետ, և, կարծում եմ, վաղը` նախագահ Թրամփի հետ, որպեսզի կարծիքներ փոխանակենք և ստեղծված իրավիճակից դուրս գալու ճանապարհներ առաջարկենք»,- ասել է Ֆրանսիայի նախագահը:

Մակրոնը կարծում է, որ տարածաշրջանային ճգնաժամերը, ներառյալ Լեռնային Ղարաբաղի հակամարտությունը, հնարավոր չէ լուծել առանց Ռուսաստանի:

Նա ասել է, որ Ֆրանսիան անընդունելի և վտանգավոր է համարում Թուրքիայից հնչող ռազմաշունչ հայտարարությունները, որոնք Ադրբեջանին մղում են ռազմական գործողության:

Ես նշեցի Թուրքիայի քաղաքական հայտարարությունները, որոնք անմտածված են և վտանգավոր»,- ասել է Մակրոնը: Ֆրանսիան  ծայրաստիճան մտահոգված է վերջին ժամերին Թուրքիայից հնչող ռազմատենչ հայտարարություններով, որոնք Ադրբեջանին դրդեցին փորձել հետ վերադարձնել Լեռնային Ղարաբաղը: Մենք դա անընդունելի ենք համարում: