Ձեր վստահելի աղբյուրը

«Արցախի շփման գծի ամբողջ երկայնքով շարունակվում են ինտենսիվ մարտերը»,- այսօր լրագրողների հետ հանդիպմանն ասաց ԱՀ նախագահի մամուլի խոսնակ Վահրամ Պողոսյանը՝ անդրադառնալով Արցախում եղած օպերատիվ իրավիճակին։

Նրա խոսքով, անցած ողջ գիշերվա ընթացքում շփման ամբողջ գծով եղել են ինտենսիվ մարտեր։ Վիճակն ավելի լարված է եղել Արցախի հյուսիսային և հյուսիս-արևելյան հատվածում։ 

Ըստ բանախոսի, Ադրբեջանի զինված ուժերը որոշակի հաջողություններ ունեցել են մարտերի միայն առաջին օրվա ընթացքում։ Սեպտեմբերի 27 լույս 28-ի գիշերվա ընթացքում արդեն ՊԲ-ն կարողացել է վերականգնել կորցրած դիրքերի մեծ մասը. այդ հաջողությունները մինչ այսօր ընթանում են։

«ՊԲ-ն կարողանում է ինտենսիվ կերպով կասեցնել Ադրբեջանի բոլոր հարձակողական գործողությունները, որոնք իրականացվում են Թուրքիայի զինուժի աջակցությամբ։ Ադրբեջանում այսօր գտնվում են թուրքական զինուժի բավականին մեծ ստորաբաժանումներ։ Ուզում եմ հստակ հայտարարել, որ անցած գիշեր Ադրբեջանի բոլոր հարձակողական գործողությունները ձախողվել են։ Ադրբեջանի բանակն ունի կենդանի ուժի և զինտեխիկայի շատ մեծ կորուստներ»,- ներկայացրեց նա։

Վահրամ Պողոսյանը նշեց, որ ցավոք սրտի, Ադրբեջանի բանակը շարունակում է թիրախավորել քաղաքացիական բնակավայրերը. գիշերվա ընթացքում Ստեփանակերտի երկնքում հայտնված հարվածային ԱԹՍ-ներից երկուսը մենք խոցել ենք։  Բայց, նրա խոսքով, այս պահին ենթակառուցվածքների առումով խնդիրներ չկան, դրանք շարունակում են բնականոն աշխատանքը, խնդիրները հիմնականում այն հատվածներում են, որոնք հակառակորդի հրետակոծության տակ են։

«Մենք շարունակում ենք մեզ նետված այս մարտահրավերին դիմագրավել։ Պայքարում ենք, և շարունակելու ենք պայքարել։ Ուզում եմ շեշտել, որ Արցախը տասնամյակներ առաջ էլ, այսօր էլ խաղաղության կողմնակից է։ Մենք գտնում ենք, որ Արցախի հարցը պետք է լուծվի խաղաղ բանակցությունների միջոցով։ Այստեղ ապրում են մարդիկ, որոնք պայքարում են իրենց իրավունքների համար, և ոչ մի ագրեսիա մեզ հետ չի պահի մեր նպատակներից»,- շեշտեց նա։

Արցախի նախագահի խոսնակը վերահաստատեց, որ այս պահի դրությամբ ՊԲ-ն ամբողջությամբ վերահսկում է Ադրբեջանի ագրեսիան, և դա ապացուցում է, որ ՊԲ-ն տարածաշրջանում առաջին հերթին խաղաղության և կայունության երաշխավոր է։

«Մի հետաքրքիր զուգահեռ եմ ուզում անցկացնել. այս տարածաշրջանում երեսուն տարի առաջ տեղի ունեցած գործողությունների ընթացքում էլ Արցախի բնակչությունը կանգնել էր իր անկախության և ինքնորոշման համար, բայց ստացել էր Ադրբեջանի կողմից պարտադրված պատերազմ։ Դրանց արդյունքում մենք ունենք այն, ինչ ունենք այսօր։ Եվ եթե այս ընթացքում Ադրբեջանը շարունակի իր ագրեսիվ գործողությունները ՊԲ-ն միայն իր նախկին բնագծերը վերականգնելով չի բավարարվի»,- ասաց Վահրամ Պողոսյանը։