Ձեր վստահելի աղբյուրը

Ադրբեջանի ագրեսիայի հետևանքով քաղաքացիական անձանց կրած վնասների վերաբերյալ փաստահավաք առաքելության արդյունքների հիման վրա պատրաստվել է միջանկյալ զեկույց հայերենով ու անգլերենով։ Լրագրողների հետ հանդիպմանը հայտարարեց Արցախի Հանրապետության ՄԻՊ Արտակ Բեգլարյանը՝ հիշեցնելով, որ սեպտեմբերի 27-ին նախահարձակ Ադրբեջանը թիրախավորել է նաև քաղաքացիական բնակչությանն ու առաջնագծին մոտ ու հեռու գտնվող բնակավայրերը, այդ թվում մայրաքաղաք Ստեփանակերտը։

«Առ այսօր շարունակվում են ռազմական գործողությունները, և քաղաքացիական բնակչությունը լայնորեն ու մեծամաշտաբ կերպով թիրախ է դառնում ու դարձել այս օրերի ընթացքում ադրբեջանական զինուժի կողմից։ Դրա հետևանքով, այսօրվա դրությամբ, Մարտունու դեպքը ներառյալ, զոհվել է 11 քաղաքացիական անձ, 60-ից ավելի վիրավոր, որից 42-ը, մեր արձանագրմամբ, լրջորեն վիրավորված անձինքն են»,- հայտնեց Մարդու իրավունքների պաշպանը։

Արտակ Բեգլարյանն ասաց, քաղաքացիական բնակչության շրջանում ատաջին չորս զոհերը գրանցվել են պատերազմի հենց առաջին օրը՝ սեպտեմբերի 27-ին, երկու դեպք գրանցվել է Մարտունի քաղաքում, երբ զոհվել էին տատիկն ու մանկահասակ թոռնիկը, Հադրութում՝ իր բնակարանում ինքնասպան ԱԹՍ-ի հարվածից զոհվել էր 79-ամյա, Մարտակերտի Մեծ Շեն գյուղում երիտասարդ տղա էր զոհվել։

«Հադրութի դեպքը ցույց է տալիս, որ խաղաղ բնակչությունը նպատակային ու դիտավորյալ կերպով թիրախավորվում է, ինչը միջազգային մարդասիրական նորմերի կոպտագույն խախտում է, ավելին ասեմ, պատերազմական հանցագործություն է»,- ասաց նա։

ՄԻՊ-ը մանրամասնեց, երեկ Մարտակերտում ադրբեջանական օդուժի կողմից սպանվել են մի ընտանիքի երեք տարեց անդամներ՝ երկու կին, մեկ տղամարդ։

Այսօր՝ հոկտեմբերի 1-ին Մարտունի քաղաքում թիրախային ու նպատակային հրետակոծության, քաղաքացիական օբյեկտների թիրախավորման հետևանքով, ըստ նախնական տվյալների, չորս հոգի սպանվել է, 11 հոգի վիրավորվել, ներառյալ հայ և ֆրանսիացի լրագրողներ։

«Այս զեկույցում ներկայացված են մահվան ու վիրավորման դեպքերը երեկվա դրությամբ չենք հասցրել այսօրվա դեպքերը ներառել, քանի որ տվյալների հավաքագրում չենք հասցրել»,- ասաց նա։

ՄԻՊ խոսքով, վիրավորման դեպքերն էլ բավականաին լայն աշխարհագրություն ունեն, տասից ավելի լուրջ վիրավորներ կան Ստեփանակերտում, հինգ դեպք Մարտունիում, Մարտակերտում, Մատաղիսում, Հադրութում, Բերձորում ևս վիրավորման դեպքեր են գրանցվել։

«Այստեղից ակնհայտ է, որ Ադրբեջանը առաջնագծի ողջ երկայնքով ու բնակավայրերի ամբողջ խորությամբ թիրախավորում է և ռազմական օբյեկտները, և խաղաղ բնակչությանը։ Համեմատության համար նշեմ, որ Հադրութն առաջնագծից 20 կմ հեռավորության վրա է, Ստեփանակերտը՝ 30 կմ, Բերձորը՝ 62 կմ»,- ամփոփեց նա։

Բեգլարյանի խոսքով, երեկվա դրությամբ վիրավորների թվում մինչև 14 տարեկան երեք երեխա կա, 50-ից բարձր՝ 15 մարդ։