Ձեր վստահելի աղբյուրը

Արցախի պաշտպանության բանակը հմուտ գործողություններ է իրականացնում՝ կանխարգելելու Ադրբեջանի և Թուրքիայի համապատասխան գործողությունները։ Ասուլիսում ասաց Արցախի և Հայաստանի պաշտպանության նախկին նախարար Սեյրան Օհանյանը։

Նա նշեց, որ սադրիչ կողմը՝ Ադրբեջանի Զինված ուժերն, այս անգամ Թուրքիայի անմիջական մասնակցությամբ, նրա սպառազինության, նրա կողմից փորձառու մասնագետների, նրա կողմից պատվիրված տարբեր երկրների տարբեր վարձկանների, նրանց անմիջական մասնակցությամբ է պատերազմական գործողություններ իրականացնում։

Ս.Օհանյանի խոսքով, թշնամին չի կարողացել հասնել իր նպատակին. «Հեռահար նպատակն է  եղել 2-3 օրվա ընթացքում մխրճվել մոտ 10-15 կմ Արցախի ՊԲ խորություն, այնուհետև բանակցային գործընթացում պարտադրանքի լեզվով խոսել Արցախի ու Հայաստանի ղեկավարության հետ։ Ըստ էության, նրանք խախտել են հերթական պայմանավորվածությունը ուժի չկիրառման հարցում։

Հանդիպելով Արցախի ՊԲ հմուտ գործողություններով պայմանավորված դիմադրությանը, ստանալով հսկայական ծավալով և անձնակազմի, և սպառազիության, և ռազմական տեխնիկայի, օդուժի, անօդաչու թռչող սարքերի խոցումներ, չեն կարողացել հասնել իրենց նպատակին։  Այդ ամենը Պաշտպանության բանակի և նրա կազմում գտնվող համապատասխան մասնագիտական ստորաբաժանումների հրամանատարական կազմի, զինվորների հերոսական գործողությունների շնորհիվ է։ Կարելի է ասել մարտական գործողությունների ընթացքում այսօր դիրքային պատերազմ է ընթանում»,- ասաց նախկին նախարարը։

Ս.Օհանյանի խոսքով, հմուտ գործողություններով ՊԲ զինծառայողները կարողանում են խոցել Ադրբեջանի օդուժը, անօդաչու թռչող սարքերը, ՊԲ զինծառայողը մեկ ժամվա հակատանկային գործողություններով հակառակորդի շուրջ 7-8 զրահատեխնիկա է խոցում, մերձամարտի մեջ են մտնում ու ոչնչացնում։

«Պետք է ամուր լինենք, խուճապի չմատնվենք։ Մեր պատերազմն արդարացի է, իսկ արդարացի  պատերազմների ժամանակ բոլորը հաղթանակներ են կրում»,- ասաց Ս.Օհանյանը։

Նա նաև նշեց. «Ինձ համար մեծ պատիվ է այսօր Արցախի իշխանությունների պլանի համաձայն ներկա գտնվել այս հանդիպմանը ու ներկայացնել այն իրավիճակը, որ տիրում է Արցախում, մարտական գործողությունների թատերաբեմում։

Արցախում են այսօր Արցախի  բոլոր նախագահները, ինձ համար մեծ պատիվ է Արցախի նախագահ Արայիկ Հարությունյանի կոչով նաև մեր պարտքով գտնվել Արցախում։

Հանդիպել ենք Արցախի նախագահի հետ, պաշտպանության նախարարներով այցելել ենք պաշտպանության նախարարի ղեկավարման կետ, մեր աջակցություն ենք հայտնել, տիրապետում ենք իրավիճակին, ծանոթացել ենք այն աշխատանքներին, որոնք իրականացում է ղեկավարությունը։

Ծանոթանալով կատարվող աշխատանքներին՝ եկել ենք այն եզրակացության, որ Արցախի ՊԲ հրամանատարական կազմը, շտաբն իրենց շարունակական զարգացումը, կատարելագործումն ապահովել են, այսօր հրամանատարությունն իր ենթակաների հետ միասին հմուտ ղեկավարում է  մարտական գործողությունները։ Մենք համոզվեցինք, որ մենք նրա ղեկավարման կետում բան չունենք անելու։ Եվ մենք մեր աջակցությունը, մնացած գործողություններն իրականացում ենք Արցախի ժողովրդի ու մնացած միջոցառումներին մեր հնարավորության շրջանակներում»։