Ձեր վստահելի աղբյուրը

Անցած գիշեր առաջին անգամ սեպտեմբերի 27-ից հետո առաջնագծի ամբողջ երկայնքով հարաբերական անդորր է եղել՝ բացառությամբ մի քանի փոխհրաձգությունից։ Ասուլիսում ասաց Արցախի նախագահի մամուլի խոսնակ Վահրամ Պողոսյանը:

«Օպերատիվ իրավիճակը կարող ենք գնահատել հարաբերական հանգիստ, քանի որ պատերազմը շարունակվում է»,- նշեց նա:

Վ.Պողոսյանի ներկայացրեց հետախուզության փոխանցած մի քանի տվյալներ. «Պարզվում է՝  այս օրերի ընթացքում առաջնագծի տարբեր ուղղություններում Ադրբեջանի զոհերի մեծ մասը եղել են Ադրբեջանում ապրող ազգային փոքրամասնությունների ներկայացուցիչներ:  Սրանք հետախուզական տվյալներ են։ Միայն մի ուղղությամբ 148 լեզգի զինվոր է զոհվել։ Մի քանի հարյուր զոհեր եղել են ազգությամբ թալիշ զինվորների շրջանում:

Սա լուրջ դժգոհություն է առաջացրել Ադրբեջանում ապրող ազգային փոքրամասնությունների մոտ, հավանաբար առաջիկայում ականատեսը կլինենք այդ ազգերի ներկյայացուցիչների բողոքի ակցիային: Իրականում այս փաստերը ևս մեկ անգամ վկայում են, որ Ադրբեջանը նման սադրիչ գործողություններն օգտագործում  է նաև իր երկրում ապրող ազգային փոքրամասնությունների  նկատմամբ նման վարքագիծ դրսևորելու համար»,- ասաց Արցախի նախագահի մամուլի խոսնակը:

Նա ընդգծեց, որ հիմնականում ադրբեջանից զինվորների բոլոր այն դիակները, որոնք հայտնվել են հայկական տարածքում, գրեթե բոլորի գրպաններում եղել են ներարկիչներ:

«Սա խոսում է այն մասին, որ Ադրբեջանը պատերազմի է ուղարկում զինվորներին արդեն թմրեցրած վիճակում: Սա միանաշանակ ռազմական հանցագործություն է», - ասաց Վ.Պողոսյանը:

Նա նշեց, որ Պաշտպանության բանակն  ամբողջութամբ վերահսկում է  իրավիճակը, հակառակորդի բոլոր սադրիչ գործողությունները ստանալու են արժանի, համաչափ պատասխան:

Վ.Պողոսյանն ասաց,  որ երկրում ներքաղաքական, տնտեսական իրավիճակը կայուն է, ենթակառուցվածքները շարունակում են աշխատել, որևէ խնդիր չկա, ժողովուրդը շարունակում է  ապրել իր բնականոն կյանքով, իհարկե,  պատերազմական իրավիճակին հատուկ:

«Ոչ մի խուճապ, արտառոց խնդիրներ չունենք այս առումով»,- ասաց Վ.Պողոսյանը:

Հիշեցնենք՝  սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։