Ձեր վստահելի աղբյուրը

Առնվազն երեք սիրիացի վարձկան է սպանվել Լեռնային Ղարաբաղում։ Այս մասին իմացել է Guardian-ը՝ հաստատելով նախկինում տարածված տեղեկությունները, որ Ադրբեջանի կողմից Լեռնային Ղարաբաղում օտարերկրյա վարձկաններ են կռվում։

Guardian-ի հաղորդմամբ, սիրիացի վարձկաններն աշխատում են Թուրքիայի անվտանգության ընկերությունների համար։

Սիրիայի Իդլիբ նահանգում ընդդիմության վերջին հենակետում գտնվող մի քանի տղամարդ այս շաբաթ Guardian-ին ասել են, որ ռազմական հրամանատարներն իրենց առաջարկել են աշխատել Ադրբեջանի դիրքերում ու պահպանել նավթի և գազի օբյեկտները՝ երեք-վեցամսյա պայմանագրերով՝ ամսական 1000-ից 1500 դոլար աշխատավարձով։

Օմար Աբդոն, սպանված մարտիկ Մուհամեդ Շաալանի զարմիկը, ալ Աթարիբ քաղաքից, ասել է, որ Ալ Համզա ստորաբաժանման տղամարդիկ երեքշաբթի օրը կապվել են ընտանիքի հետ`նրանց տեղեկացնելով Շաալանի սպանվելու մասին:

«Նա մեզ ասաց, որ սեպտեմբերի 20-ին մեկնում է Ադրբեջան: Մենք չգիտենք նրա մահվան հանգամանքները, և մեզ ասացին, որ այս պահին դժվար է նրա դիակը բերել, բայց կփորձեն», - ասել է զարմիկը:

Այն Ջարա գյուղից Հուսեյն Թալհայի և Սադամ Ազիզ Ազկորի ընտանիքները նույնպես ասում են, որ երեքշաբթի զորամասի հրամանատարները զանգահարել են իրենց՝ ասելու, որ իրենց հարազատները սպանվել են: Տեղական լրատվամիջոցները հայտնում են ևս երեք սպանվածների մասին:

«Սիրիացիների արագ մոբիլիզացումն առաջնագծում, ինչպես նաև այն փաստը, որ սիրիացի կամավորներն ասում են, որ հավաքագրումը սկսվել է մեկ ամիս առաջ, ենթադրում է, որ Ադրբեջանը որոշ ժամանակ պլանավորում էր իր ռազմական արշավը»,-գրել է Guardian-ը։

Syriahr կայքը ևս գրում է, որ Անկարայի կողմից աջակցվող վարձկաններ են սպանվել Ադրբեջանում՝ հղում անելով Սիրիայում մարդու իրավունքների դիտորդական կառույցին։