Ձեր վստահելի աղբյուրը

«Ռազմաճակատում իրավիճակի և մարտական գործողությունների իմաստով, իհարկե, ներկայացվում են և Հայաստանից և Ադրբեջանից եկող լրատվությունը, բայց եթե դիտարկելու լինենք բովադակությունը, ապա քարոզչական ուղղությունն ավելի շատ պրոադրբեջանական է»,- «Արմենպրեսի» մամուլի սրահում հայտնեց վրացագետ Ալիկ Էրոյանցը՝ ներկայացնելով Միխեիլ Սաակաշվիլիին աջակցող լրատվամիջոցների գործունեությունը: Որպես օրինակ նա նշեց այն միտումը, որ ընդդիմադիր հեռուստատեսությունները Հայաստանից տարածվող տեսանյութերը ներկայացնելիս դրանք  որակում են որպես դաժանություն, իսկ  Ադրբեջանի նույնատիպ տեսանյութերը՝ հայրենասիրական:

Մյուս փորձագետը՝ Ջոնի Մելիքյանը այդ միտումը կապեց հոկտեմվերի 31-ին Վրաստանում սպասվող ընտրությունների հետ, երբ ընդդիմությունը փորձում է տարբերվել Վրաստանի հանրային հեռուստատեսության հավասարակաշռված դիրքորոշումից:

«Ոչ մեկի համար նորություն չէր Սաակաշվիլիի դիրքորոշումը և մոտեցումը հարևան Ադրբեջանի նկատմամբ, բայց այս անգամ նա նախընտրել է երևի չստանալ հայերի կամ Ջավախքի հայերի ձայները»,-հայտնեց  Ջոնի Մելիքյանը և  ենթադրեց, որ նա նախընտրել է տեղի ադրբեջանցիների ձայները:

Նրա խոսքով Սաակաշվիլու և իր լրատվամիջոցների ոչ բալանսավորված մեկնաբանությունների պատճառով Ջավախքի հայերը հայրենասիրությամբ ոգևորված ցանկանում են աջակցել Հայաստանին և սահմանին բախվում են որոշ օրենսդրական խնդիրների հետ: Չունենալով համապատասխան փաստաթղթեր՝ նրանք փորձում են հումանիտար օգնություն տեղափոխել Հայաստան, կամ գրանցվել և առաջնագիծ մեկնել:

Մելիքյանը տեղեկացրեց, որ դեռ ուկրաինական և սիրիական ճգնաժամի ժամանակ Վրաստանը օրենքով քրեականացրել է իր քաղաքացիների մասնակցությունը այլ երկրների ռազմական գործողություններին:

Փորձագետը կարևորեց, որ այս հաղորդագրությունը հասցվի տեղի հայ բնակչությանը, որ ռազմաճակատում  իրենց մասնակցության կարիքը չկա, մեր  զինվորներն իրենց խնդիրները լավ են կատարում: Ըստ Մելիքյանի, վիրահայերը կարող են  այլ միջոցներով, մասնավորապես՝ հիմնադրամների միջոցով ֆինանսական աջակցություն տրամադրեն: Վրեջինս Վրաստանի հայերին կոչ արեց զգոն լինեն, քանի որ թիրախավորվում են թշնամու կողմից: