Ձեր վստահելի աղբյուրը

«Ապրիլյանի ժամանակ Արցախի դեմ կռվում էր Ադրբեջանը, և ռուսն ի վիճակի էր «համոզելու» Ադրբեջանին և խնդրելու Հայաստանին՝ զինադադարի առումով»,- ասուլիսում ասաց Արցախի նախագահ Արայիկ Հարությունյան՝ պատասխանելով ռազմական գործողությունները դադարեցնելու հարցում Ռուսաստանի հնարավոր միջնորդության մասին հարցին։

Նա նշեց, որ այսօր պետք է խոսի Հայաստանի հետ և Թուրքիայի հետ։

«Ես չգիտեմ՝ ռուսական իշխանությունն ինչքանով է պատրաստ խոսել Թուրքիայի ղեկավարության հետ»,- նշեց Արցախի նախագահը։

Ա.Հարությունյանի խոսքով,  համարում են, որ տարածաշրջանում արդեն վաղուց իր անթաքույց շահագրգռվածությունն է հայտնում Թուրքիան, նրանց՝ վաղուց արդեն զինվորականների և այսօր ավիացիայի մասնակցությունը ռազմական գործողություններին դրա վառ ապացույցն է։

Հարցին՝ կարո՞ղ ենք նշել այն գործոնները, որոնք կարող են նպաստել պատերազմի ավարտին, Արցախի նախագահն ասաց. «Առաջին գլխավոր ֆակտորը խելքի ֆակտորն է, որը բացակայում է  թշնամու մոտ, երբ Ադրբեջանի ժողովուրդը հասկանա, որ ունի հակաադրբեջանական իշխանություն։

Հիմնավորեմ. պատերազմն ավարտվելու է Ադրբեջանի պարտությամբ, կամ լավագույն դեպքում ոչ հաղթանակով։ Հետևանքները՝ հազարավոր կամ տասնյակ հազարավոր զոհեր, բազմակի անգամ ավելի շատ վիրավորներ՝ իրենց կողմից, տնտեսության քայքայում, որը տասնամյակներով վերականգնել հնարավոր չի լինելու, Ադրբեջանի ժողովուրդը տասնամյակներով ունենալու է սոցիալական լուրջ խնդիրներ ու լարվածություն, իսկ նավթի պաշարները նվազում են, ֆինանսական պահուստները վերջանում են, իհարկե, հասկանում ենք, որ պետք է արդարացնեն այս ժամանակահատվածում հարյուրավոր միլիարդ դոլարների փոշիացումը։ Իսկ դատաստանը տեսնելու է հենց Ադրբեջանի ժողովուրդն իր իշխանությունների առումով»։

Նա նաև նշեց, որ անցնող 4 օրում հայկական կողմից խոցվել է թշնամու նույնքան զրահատեխնիկա, որքան ողջ Առաջին արցախյան պատերազմում։ 

Ինչ վերաբերում է տարածաշրջանից վարձկաններին հեռացնելու ՌԴ ԱԳՆ-ի կոչի,  Արցախի նախագահն ասաց. «Շամիլ Բասարը ճիշտ պատասխան է տվել 1990-ականներին՝ սա մեր պատերազմը չէ: Վարձկանները երբևէ դեռ որևէ երկրի օգուտ չեն բերել: Դա պետք է հասկանա նաև  Ադրբեջանցի ժողովուրդը։

Մենք տեսնելու ենք որպես փորձանք Ադրբեջանի ժողովրդի համար այդ նույն վարձկաններին»,- ասաց Ա. Հարությունյանը:

Հարցին, թե ի՞նչ ազդակներ եք ստանում Իրանից, Ա. Հարությունյանն ասաց, որ բացի մի քանի սովորական հայտարարություններից, ոչ մի կոնկրետ քայլ չեն տեսել. «Ուզում եմ հայտարարել, որ այս պատերազմի հասցեատերերից մեկը Պարսկաստանն  է, որովհետև այս պատերազմն ուղղված է նաև Պարսկաստանի դեմ, որովհետև մենք գիտենք տարածաշրջանային ինչպիսի խնդիրներ կան նաև կապված մանավանդ Հյուսիսային Իրանի հետ»։

Հայաստանի կողմից Արցախի ճանաչման մասին հարցին ի պատասխան Արայիկ Հարությունյանն ասաց. «Մեր քաղաքական օրակարգի բոլոր հարցերն ընթացքում են, որոշումը լինելու է այնպիսին, որ ապագայում քաղաքական դաշտում միջազգային հանրության կողմից Արցախի  ճանաչված ինքնորոշման իրավունքի իրացման առումով խնդիրներ չունենանք»։

Արայիկ Հարությունյանը նաև ասաց. «Մենք պետք է պատրաստ լինենք ընդհանուր առմամբ երկարատև պատերազմի, որովհետև եթե պատրաստ չլինենք, խնդիրներ կունենանք մեր երկրում ապրելու իրավունքը իրացնելու հարցում։

Իսկ թե ինչպես է վարվելու մեր Պաշտպանության բանակը՝ հակառակորդին խաղաղություն է պարտադրելու»։