Ձեր վստահելի աղբյուրը

Ռազաճակատի տարբեր ուղղություններում ադրբեջանական զինուժին հասցված հարվածները, մեծաթիվ կորուստները մեզ ոչ մի դեպքում հանդարտվելու, զգոնությունը թուլացնելու առիթ չեն տալիս։ Այս մասին ֆեյսբուքյան իր էջում գրել է «Հենակետ» վերլուծական կենտրոնի ղեկավար, Արցախի նախկին նախագահի խորհրդական Տիգրան Աբրահամյանը։

«Նույնը վերաբերվում է տեղեկատվական պայքարին։

Հայաստանի և Արցախի ներքին համախմբվածությունը վնասող ցանկացած հայտարարություն, գրառում, քայլ պետք է արագ կանխել, չեզոքացնել, ինչ գնով էլ լինի։

Ներքին հակասությունները, հակակրանքը, ոչ սթափ գնահատականները պետք է փաթեթավորել և ուղարկել աղբարկղ։

Մեզ մարտիկներ են անհրաժեշտ պայքարի բոլոր ճակատներում, իսկ դա միայն ռազմաճակատը չի»,- գրել է նա։

Հիշեցնենք, որ երեկ Արցախի նախագահ Արայիկ Հարությունյանն իր ճեպազրույցի ընթացքում անդրադարձել էր նաև հայաստանյան որոշ ԶԼՄ-ների աշխատանքին՝ նշելով, որ այդ ԶԼՄ-ները պատվերով իրեն վարկաբեկող նյութեր էին հրապարակում, և ինքը դա չի մոռացել։ Նա նշել էր, որ այդ լրատվամիջոցների, իր խոսքով, «ներքին թշնամիների» դեմ պայքար ևս լինելու է։ Այս հայտարարությունը բազում քննարկումների և քննադատությունների պատճառ էր դարձել։