Ձեր վստահելի աղբյուրը

Թբիլիսահայ Իրենա Խառազովան Ջավախքում էր, որպեսզի իր և իր ընտանիքի օգնությունը փոխանցեր Արցախին: Jnews-ը գրում է, որ նա առաջին և դեռևս միակ հայուհին է, որը հաղթահարել է Էվերեստի բարձրունքը (8 848 մետր) և պարզել Արցախի դրոշը:

Իրենա Խառազովայի ծնողները Թբիլիսիից են, սակայն ինքը ծնվել ու մեծացել է Ռուսաստանում: Նա Հայաստանում մի անգամ է եղել, իսկ Արցախում երբեք չի եղել: Որոշել է պատերազմից հետո անպայման գնալու է Արցախ:

Նա և իր ընտանիքը որոշել են պարեն, տաք հագուստ և վերմակներ ուղարկել Արցախ: Դրա համար նա գնացել էր  Ջավախք, որպեսզի անձամբ օգնությունը փոխանցի Ախալքալաքի այն երիտասարդներին, ովքեր ոչ միայն դրամահավաք են իրականացնում, այլև հագուստ, դեղորայք ու պարեն են հավաքում, վերադասավորում և ուղարկում Հայաստան:

«Ճիշտ է ես Արցախում չեմ եղել, սակայն չեմ կարող անտարբեր լինել և տանը նստած պարզապես հետևել կռվին: Ես գտնում է, որ յուրաքանչյուր հայի պարտքն է, թեկուզ իր փոքրիկ ներդրումն ունենալ հայրենիքի պաշտպանության գործին»,- ասել է Իրենա Խառազովան:

Ախալքալաքի երիտասարդներից մեկն ասել է, որ մարդկանց հոսքը չի դադարում: Ով ինչով կարողանում է, փորձում է օգտակար լինել:

«Մարդիկ անդադար գալիս են, քաղաքից, գյուղերից, բոլորը պատրաստակամ են օգնելու: Այսօր մեր երիտասարդները, դպրոցական տարիքի երեխաները գալիս ասում են, ինչով կարող են օգնել: Արդեն 6 ֆուռ ուղարկել ենք: Ամեն ինչ դասավորած, առանձին տուփերով»,- ասել է մի երիտասարդ:

Հարկ է նշել, որ այս օրերին օգնություն են հավաքում Ախալքալաքում, Նինոծմինդայում, Ախալցխայում, Ծալկայում և այլուր:

Հիշեցնենք՝  սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։ Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, Մարտունին, Մարտակերտը, Հադրութը: Բնակչությանը կոչ է արվել պատսպարվել։
Թե Հայաստանում, թե Արցախում հայտարարված է ռազմական դրություն և ընդհանուր զորահավաք։