Ձեր վստահելի աղբյուրը

Դատարանը քննում է ԲՀԿ ղեկավար Գագիկ Ծառուկյանի կալանքի դեմ պաշտպանների վերաքննիչ բողոքը։

«Չորս ամիս անձն ազատության մեջ էր, չի խոչընդոտել քննությանը, չէ էլ փորձել խոչընդոտել»,- լրագրողների հետ զրույցում ասաց Գ.Ծառուկյանի պաշտպան  Երեմ Սարգսյանը:

Նրա խոսքով, այս պահի դրությամբ նման մեղադրանքով որևէ մեկը չի գտնվում կալանքի տակ:

«Հարց է ծագում՝ ինչպե՞ս է ստացվում, որ Գագիկ Ծառուկյանի պարագայում չորս ամիս ազատության մեջ լինելուց հետո հանկարծ գնում են, որ պետք է կալանավորվի:
Ասում են՝ այն հայտարարությունները, որ պատգամավորները գրել էին՝  կոնկրետ արդյունքներ չապահովելու դեպքում պատրաստակամ են հրաժարավել, վկայում է այն մասին, որ Գագիկ Ծառուկյանն ունի անվերապահ ազդեցություն, հեղինակություն, նրանց վրա կարող է խոչընդոտել: Առանց այս փաստաթղթերի որևէ մեկը կա՞ր, որ  կասկածում էր, որ Ծառուկյանն ունի հեղինակություն:

Սրանք են դիտարկվել որպես կալանավորման անհրաժեշտություն հիմնավորող փաստական տվյալներ, ինչն աբսուրդ է»,- ասաց պաշտպանը:

Ե. Սարգսյանի խոսքով, դատարանում հետևյալ խնդիրն էին բարձրացնում. «Կոնկրետ իրավիճակում պետք է հանրային շահն էլ դիտարկել:

Այս պահին, այսօրվա ռազմական դրության իրավիճակում, երբ համայն հայությունը միավորվել է, խմբակցությունը, որն ԱԺ-ում երկրորդն ուժն է, ունի միջազգային կապեր այլ կուսակցությունների հետ, վստահ եմ՝ կուսակցության ղեկավարը լուրջ անելիքներ ունի»:

Դատախազներն առարկել են պաշտպանների միջնորդությունը: Ե.Սարգսյանի խոսքով, մեղադրանքի կողմն ասում, որ սա զուտ իրավական գործընթաց է. «Իհարկե, կա՞ որևէ դատախազ, դատավոր, որ գործող իշխանության պայմաներում կասի, որ սա իրավական  չէ, քաղաքական է: Կա նման բան: Նման բան չի լինում»: 

Ինչ վերաբերում է «Լուսավոր Հայաստան» խմբակցության ղեկավար Էդմոն Մարուքյանի՝ Գագիկ Ծառուկյանի խափանման միջոցը վերանայելու հարցով գլխավոր դատախազին դիմելուն, Ե. Սարգսյանն ասաց. «Նա, լինելով Ազգային ժողովում, առավել լավ է պատկերացնում, թե ինչ անհրաժեշտություն կա:

Ռազմական դրությունը նշանակության է իրադրության կտրուկ փոփոխություն»:

Նշվեց, որ Գագիկ Ծառուկյանը նիստին ներկա չի ցանկացել գտնվել՝ հաշվի առնելով մտահոգու  անտրամադիր վիճակը:

Հիշեցնենք, որ Երևանի ընդհանուր իրավասության դատարանը, դատավոր Մնացական Մարտիրոսյանի նախագահությամբ,  սեպտեմբերի 25-ին բավարարել էր  ԲՀԿ առաջնորդ Գագիկ Ծառուկյանին կալանավորելու քննիչի միջնորդությունը։
Հունիսի 16-ին ԱԺ «Իմ քայլը» խմբակցության 87 պատգամավորներ փակ գաղտնի քվեարկությամբ նախ զրկել էին Գ.Ծառուկյանին անձեռնմխելիությունից, ապա համաձայնություն տվել նրան ազատությունից զրկելու հարցին։  Ազգային ժողովում ՀՀ գլխավոր դատախազ Արթուր Դավթյանը հայտնել էր, որ քրեական գործով ձեռք բերված ապացույցների համակցությունը բավարար հիմք է տալիս ԱԺ պատգամավոր Գագիկ Ծառուկյանին մեղադրանք առաջադրելու ԱԺ 2017 թվականի ապրիլի 2-ի ընտրություններին մասնակցած «Ծառուկյան կուսակցությունների դաշինքի» և դրա կողմից առաջադրված թեկնածուի օգտին քվեարկելու համար կաշառք տալը կազմակերպելու համար։
Հիշեցնենք, որ հունիսի 21-ին Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, մերժել էր Ծառուկյանին կալանավորելու ԱԱԾ քննիչի միջնորդությունը: Դատարանի այս որոշման դեմ վերաքննիչ բողոք ներկայացրեցին թե դատախազությունը, թե պաշտպանական կողմը։ Վերաքննիչ քրեական դատարանը հուլիսի 8-ին մերժել էր փաստաբանների բողոքը, իսկ դատախազության բողոքը մասնակի բավարարել՝ բեկանելով դատարանի որոշումը և ուղարկելով նոր քննության։