Ձեր վստահելի աղբյուրը

Ռուսաստանի արտգործնախարար Սերգեյ Լավրովը, Ֆրանսիայի արտաքին գործերի նախարար Ժան-Իվ Լը Դրիանը և Միացյալ Նահանգների պետքարտուղար Մայք Պոմպեոն համատեղ հայտարարություն են տարածել՝ կոչ անելով դադարեցնել կրակը Լեռնային Ղարաբաղում: Հայտարարությունը ներկայացված է ՌԴ արտաքին գործերի նախարարության կայքում։

«Ռուսաստանի արտգործնախարար Սերգեյ Լավրովը, Ֆրանսիայի արտաքին գործերի նախարար Ժան-Իվ Լը Դրիանը և Միացյալ Նահանգների պետքարտուղար Մայք Պոմպեոն, որոնք ներկայացնում են ԵԱՀԿ Մինսկի խմբի համանախագահ երկրները, ամենավճռական կերպով դատապարտում են Ղարաբաղի հակամարտության գոտում և դրանից դուրս բռնության աննախադեպ և վտանգավոր սրումը։

Նախարարներն անվերապահորեն ընդգծում են, որ վերջին հարձակումները, որոնց թիրախը ենթադրաբար քաղաքացիական օբյեկտներն են եղել  ինչպես շփման գծի երկայնքով, այնպես էլ Ադրբեջանի և Հայաստանի տարածքներում` ղարաբաղյան հակամարտության գոտուց դուրս, և այդպիսի հարձակումների անհամաչափությունն անընդունելի սպառնալիք են տարածաշրջանի կայունությանը։

Հղում անելով ՄԽ համանախագահ երեք երկրների առաջնորդների հոկտեմբերի 1-ի հայտարարությանը՝  նախարարները կրկին կոչ են անում հակամարտության կողմերին անհապաղ և անվերապահորեն հրադադար հաստատել:

Համանախագահ երկրները վճռական են տրամադրված լիարժեք իրականացնել այն մադնադը, որ վստահված է նրանց ԵԱՀԿ-ի և միջազգային հանրության կողմից, Մինսկի խմբի անդամ երկրների աջակցությամբ։

Այդ մանդատին համապատասխան, նրանք կշարունակեն հետևողականորեն ակտիվացնել փոխգործակցությունը կողմերի հետ՝ նրանց կոչ անելով անհապաղ պարտավորվել վերսկսել կարգավորման գործընթացը՝ հիմնվելով առկա հիմնարար սկզբունքների և համապատասխան միջազգային փաստաթղթերի վրա, որոնք քաջ հայտնի են երկու կողմերին», - ասված է համատեղ հայտարարության մեջ: