Ծառուկյանի կալանքի որոշումը պիտի չեղարկվի. բոլորս պատկերացնում ենք նրա ազդեցությունն արտաքին ճակատում. Աբովյան
«Ծառուկյանի կալանքի որոշումը պիտի չեղարկվի. բոլորս պատկերացնում ենք պարոն Ծառուկյանի ազդեցությունն արտաքին ճակատում»,- այսօր խորհրդարանում լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Արման Աբովյանը։
Հիշեցնենք, որ այսօր 13 կուսակցություններ հայտարարությամբ են հանդես եկել՝ Գագիկ Ծառուկյանին կալանքից ազատելու միջնորդությամբ։
Արման Աբովյանի խոսքով, այսօր ասվում է, թե Հայաստանում պետք է լինի համախմբում, և այդ համախմբումն ապահովելու համար պետք է նաև որոշ քայլեր արվեն։ Ըստ պատգամավորի, այսժմ Հայաստանում և Արցախում տիրող իրավիճակից ելնելով, Գագիկ Ծառուկյանը պետք է լինի ազատության մեջ, քանի որ նա մեծ ներդրում ունի՝ թե՛ ներքին և թե՛ արտաքին դաշտերում։
«Ժողովուրդ ջան, պետերազմի մեջ ենք, և բոլոր հնարավոր ու անհնարին ռեսուրսները, որոնք ունենք, պետք է գործի դնենք։ Պարոն Ծառուկյանն այնպիսի կապեր ունի, որ պարզապես անգնահատելի են։ Ես հույս ունեմ, որ համախմբման գործընթացն իրական արտացոլում կունենա, որն էլ կարտահայտվի նաև նրա՝ կալանքից ազատման որոշմամբ։ Նա անազատության մեջ ինչ հնարավոր է, անում է։ Եվ այս պահին մենք պատերազմի մեջ ենք, որտեղ բոլոր հնարավոր ու անհնարին ջանքերն ու հնարավորությունները պետք է օգտագործվեն»։
Հարց. ԲՀԿ-ականները պատրաստվո՞ւմ են ճակատ գնալ։
Ա. Աբովյան. Եթե տեղյակ չեք, ասեմ՝ ԲՀԿ-ականները հիմա էլ ճակատում են։ Երեկ ես եմ եղել, այսօր պարոն Մադաթյանը, պարոն Աղաբաբյանը։ Նույնիսկ մեր ֆռակցիայի կանայք երկու օր առաջ Վարդենիսում են։ Ինձ այս հարցը զարմացրեց։ Հենց հիմա պարոն Մադաթյանն առաջնագծում կռվում է։
Հարց. Այս պահին անընդհատ խոսվում է, որ միջազգային հանրության կոչերը հասցեական չեն, ի՞նչ կասեք այս մասով։
Ա. Աբովյան. Միանգամայն համաձայն եմ։ Բայց եթե նկատել եք, վերջին երեք-չորս օրերի ընթացքում միջազգային հանրության կոչերը գնում են դեպի ճշմարտություն և արդարություն։ Միջազգային հանրությունը Ֆրանսիայի նախագահ Մակրոնի, ՌԴ ԱԳՆ Լավրովի, ԱՄՆ պետդեպարտամենտի շուրթերով ասում է, որ Ադրբեջանն ու Թուրքիան օգտագործում են տեռորիստական կազմակերպություններին։ Միջազգային հանրությունը հստակ փաստեց դա։ Հիմա մեզ համար կարևորագույն խնդիրն այն է, որ միջազգային հանրությունը հստակ ասի՝ Ադրբեջանը և Թուրքիան տեռորիստական պետություններ են, որոնք ագրեսիա են սանձազերծում Արցախի և Հայաստանի դեմ։
Կան ներքին խոսակցություններ, որ Եվրախորհրդարանը որոշակի պատժամիջոցներ է կիրառելու Թուրքիայի դեմ, Կանադան է գնացել հստակ քայլերի։ Սա այն սիմվոլիզմն է, որը թույլ է տալիս մեզ հուսալ, որ միջազգային հանրությունը կգա դեպի ճշմարտություն։ Պետք է հասկանալ, որ չկա Ադրբեջան պետություն, կա Թուրքիայի վիլայեթ, որը խաղաղ բնակչության դեմ կասետային ռումբեր է օգտագործում, ահաբեկիչների է օգտագործում։ Դա որոշակի պատժամիջոցների տրամաբանություն է ենթադրում։ Մեզ համար կարևոր է չդադարեցնել դիվանագիտական գրոհը, որ բոլորով իրականացնում ենք։ Օրինակ, ես երեկ Ստեփանակերտից տեսակապով մեր լեհ գործընկերների հետ էի խոսում, ցույց տվեցի՝ ոնց են շենքերին խփում, մարդիկ ապշել էին։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
