Ձեր վստահելի աղբյուրը

«Այս ժամերին, երբ Թուրքիայի ԱԳ նախարարն այցով գտնվում է Բաքվում, Ադրբեջանը հայտարարեց, որ շարունակելու է լայնածավալ ռազմական գործողություններն Արցախի խաղաղ բնակչության հանդեպ»,- ԱԺ-ում հայտարարեց «Իմ քայլը» խմբակցության պատգամավոր Տաթևիկ Հայրապետյանը և նկատեց, որ սա մեկ անգամ ևս փաստում է, որ պաշտոնական Անկարան Բաքվին հրահրում է ռազմական գործողությունների շարունակությանը:

Պատգամավորը հայտնեց՝ Չավուշօղլուն փաստացի ասել է, որ հրադադարը որևէ իմաստ և նշանակություն չունի:

«Այն, որ ադրբեջանական բանակը և անձամբ Իլհամ Ալիևը դեռ հայկական կողմերից խնդրելու է հրադադար, քննարկումներից դուրս է»,- նկատեց Հայրապետյանը և հավելեց, որ հայկական ուժերն այսօր կռվում են մշտապես պարտված և պարտվող ադրբեջանական բանակի դեմ:

Ըստ պատգամավորի, համաշխարհային հանրությունը ևս մեկ անգամ համոզվում է, որ այս կռվում խոսքը բացառապես ապրելու իրավունքի, էկզիստենցիալ անվտանգության մասին է, բայց նաև ահաբեկիչների դեմ մղվող պայքարի մասին է: Վերջիններ հստակ աջակցություն են ստանում Թուրքիայի կողմից:

Պատգամավորը նշեց, որ շարունակելու են միջազգային հարթակնրում ներկայացնել Հարավային Կովկասում տիրող իրավիճակը և թե ինչ դեր է կատարում այնտեղ Թուրքիան: 

Տաթևիկ Հայրապետյանի համոզմամբ, տարածաշրջանում և Արցախի հարցում պետք է բացառվի Թուրքիայի որևէ դերակատարումը, միայն դրանով հնարավոր կլինի ապահովել Անդրկովկասի փխրուն կայունությունը: