Ձեր վստահելի աղբյուրը

«Այս օրերին միջազգային հանրության շրջանում Ղարաբաղյան հակամարտության հարցում ընկալման որոշակի փոփոխություն տեղի ունեցավ, մեզ համար ձեռնտու փոփոխություն եղավ։ Աշխարհն ընդունեց այն փաստը, որ Թուրքիան ներգրավված է հակամարտության մեջ՝ ընդհուպ ֆիզիկապես։ Դիվանագիտական առումով սա դրական է մեզ համար»,- այսօր խորհրդարանում րագրողների հետ զրույցում ասաց ԱԺ «Իմ քայլը» խմբակցության պատգամավոր Ռուբեն Ռուբինյանը։

Նրա խոսքով, հիմա, անկախ դիվանագիտական հաջողություններից, ամենակարևորը ռազմաճակատում և թիկունքում պինդ կանգնելն է, քանի որ մեր դիվանագիտությունը կարող է հաջողել միայն այն դեպքում, եթե մենք՝ որպես ժողովուրդ պինդ կանգնենք մեր զինված ուժերի կողքին։

Հարց. Երեկ ՆԱՏՕ-ի գլխավոր քարտուղարը հանդիպեց Թուրքիայի արտգործնախարարի և նախագահի հետ։ Մենք ի՞նչ ենք ակնկալում այս հանդիպումից։ Եվ երկուստեք հնչած հայտարարություններն ինչպե՞ս կմեկնաբանեք՝ հաշվի առնելով, որ այսօր էլ Թուրքիայի արտգործնախարարն է մեկնում Ադրբեջան։

Ռ. Ռուբինյան. Թուրքիայի ցանկացած հայտարարության վերաբերյալ որևէ նոր ասելիք չկա։ Թուրքիան անցել է բոլոր կարմիր գծերը և իրեն պահում է տեռորիստ պետության պես։ Եվ, ըստ էության, վերածվել է տեռորիստ պետության։ Ինչ վերաբերում է մեր միջազգային գործընկերներին, ապա մենք նրանցից ակնկալում ենք շատ կոշտ քննադատություն Թուրքիայի և Ադրբեջանի այս հակահումանիստական գործողություններին։ Կրկնում եմ՝  ընդհանուր առմամբ կան դրական միտումներ՝ հայտարարությունների մակարդակով, բայց ամեն ինչ կախված է մեր՝ որպես ժողովուրդ, կամքից։

Հարց. Բացի կոչերից, մեր դաշնակից պետություններն ի՞նչ գործուն քայլեր պետք է անեն։

Ռ. Ռուբինյան. Խոսելով դաշնակից պետությունների մասին՝ ես վստահ եմ, որ ԵԱՀԿ Մինսկի համանախագահները, և առաջին հերթին Ռուսաստանը, կկատարի իր կարևոր դերը՝ տարածաշրջանում խաղաղություն ապահովելու։

Հարց. ՌԴ արտգործնախարարը հայտարարեց, որ Ռուսաստանը պատրաստ է կազմակերպել Հայաստանի և Ադրբեջանի ԱԳ նախարարների հանդիպում՝ ԵԱՀԿ Մինսկի խմբի շրջանակներում։ Առաջիկայում նման հանդիպում նախատեսվո՞ւմ է։

Ռ. Ռուբինյան. Այդպիսի տեղեկություն ես չունեմ։

Հարց. Այս պահին հարաբերական կայուն վիճակ է սահմանին, դա կապ ունի՞ միջազգային հանրության կոչերի հետ։

Ռ. Ռուբինյան. Այս պահին, այո, հարաբերական անդորր է, բայց պետք է հասկանանք, որ սա հայրենական թեժ պատերազմ է, որում մենք պիտի կանգնենք մինչև վերջ։

Հարց. Նիկոլ Փաշինյանն արդեն չորրորդ հարցազրույցն է ունենում ՌԴ նախագահի հետ։ Մենք ի՞նչ են ակնկալում Ռուսաստանից այս պահին։

Ռ. Ռուբինյան. Մենք վստահ ենք, որ մեր բարեկամները, և առաջին հերթին Ռուսաստանը տարածաշրջանում իր կայունացնող դերը կատարելու է։