Ձեր վստահելի աղբյուրը

«Ադրբեջանի ագրեսիայի պատճառով Հայաստանում հայտարարված է ռազմական դրություն, և Ացրախի բոլոր ուղղություններով ընթանում են մարտական գործողություններ։ Երեկ գիշեր եղել է հարաբերական անդորր։ Ու այս իրավիճակում մենք գործում ենք ռազմական դրության թելադրած պայմաններով, և մեր ունեցած հարցերը՝ ուղղված Կառավարությանը, վաղը չենք կարող հրապարակային տալ»,- այսօր խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Հիշեցնենք, որ ԱԺ նիստի ընթացքում նա ԱԺ նախագահ Արարատ Միրզոյանին առաջարկել էր փակ հանդիպում կազմակերպել խորհրդարանական ֆռակցիաներից յուրաքանչյուրի մեկ-երկու պատգամավորների և վարչապետ Նիկոլ Փաշինյանի մասնակցությամբ։

Պատգամավորի խոսքով, այդ իսկ պատճառով, տեսենելով, որ շատ ինտենսիվ շփումներ կան Մինսկի խմբի համանախագահ երկրների ղեկավարների կամ բարձրագույն օղակների ղեկավարների հետ, իրենք ուզում են տեղեկատվություն ստանալ, խորհրդակցել վարչապետի հետ, գլուխ գլխի տալ՝ այս իրավիճակից դուրս գալու համար։

Ըստ Էդմոն Մարուքյանի, այժմ տեղեկատվության փոխանակության կարիք կա։

Հարց. Ինչպե՞ս եք գնահատում պատերազմի մեկնարկից ի վեր դիվանագիտական խմբի աշխատանքը և դրանից բխող միջազգային արձագանքները։

Է. Մարուքյան. Բավականին լավ, քանի որ մենք կարողացանք հասնել նրան, որ խիստ գնահատականներ եղան՝ ուղղված Թուրքիային։ Մենք կարողացանք հասնել նրան, որ միջազգային հարթակներում հնչեցվեցին հայտարարություններ առ այն, որ Ադրբեջանն օգտագործում է վարձկանների և ահաբեկիչների, ինչը մարտահրավեր է այս տարածաշրջանի երկրների՝ թե՛ Իրանի, թե՛ ՌԴ-ի և թե՛ եվրոպական տարբեր երկրների համար։  Այս առումով շատ կարևոր էր, որ սա արձանագրվեց։ Ես կառանձնացնեի ՌԴ ԱԳՆ-ի, Ֆրանսիայի նախագահի, ԱՄՆ պետքարտուղարության, Իրանի ԱԳՆ-ի հայտարարությունները։ Կարող եմ տեղեկացնել, որ երեկ տեղի է ունեցել ԵԽԽՎ մոնիթորինգի հանձնաժողովի փակ նիստ, որի ընթացքում քննարկվել է այս հարցը, թեժ քննարկում է տեղի ունեցել, և բավականին տեղեկացրել ենք մեր գործընկերներին, թե ինչ է կատարվում։ Հենց այդ պահին Ստեփանակերտում դպրոցներ ու մանկապարտեզներ էին ռմբակոծվում, դրա մասին էլ տեղեկացրել ենք մեր գործընկերներին։

Հարց. Այս ամենից հետո բանակցությունները ո՞ր փուլից հնարավոր կլինի սկսկել։

Է. Մարուքյան. Ես չեմ կարող ասել, մինչև արյունահեղությունը չդադարի։ Համեմատաբար խաղաղությունը մեզ չպիտի թուլացնի, «արխային» գցի։ Ինչ-որ պահի կռիվը կանգ է առնում, բայց էլի կարող է սկսվել։

Հարց. Արցախը դիմել է միջազգային հանրությանն իր անկախությունը ճանաչելու կոչով։ Այս առումով ի՞նչ արձագանքներ սպասել։

Է. Մարուքյան. Հայաստանի դիվանագիտական զինանոցում կա այդ զենքը, ես կարծում եմ, որ դեռևս տեղ ունենք դա չանելու։ Դա լինելու է վերջին կրակոցը, և եթե մենք դա անում ենք՝ նշանակում է, որ էլ որևէ մեկի հետ որևէ բան չունենք խոսելու։ Իսկ մենք այդ իրավիճակում չենք դեռ։

Հարց. Նիկոլ Փաշինյանը պարբերաբար հեռախոսազրույցներ է ունենում Վլադիմիր Պուտինի հետ։ Ի՞նչ ինֆորմացիա ունեք դուք։

Է. Մարուքյան. Դրա համար առաջարկել եմ փակ հանդիպում, որ զրուցենք։ Ես կարող եմ զանգել վարչապետին և առաջարկել փակ հանդիպում։ Բայց կարծում եմ, որ ԱԺ-ն՝ որպես ինստիտուտ այս մասով անելիք ունի։ Այն, ինչ ուզում եմ ես իմանալ, վստահ եմ, որ ուզում են իմանալ նաև մեր այլ գործընկերներ։