Ձեր վստահելի աղբյուրը

«Իրականության մեջ խոսք էր գնում ոչ թե Լեռնային Ղարաբաղից զորքերը դուրս բերելու, այլ գրավյալ քաղաքներից։ Ակնհայտ է, որ իրանական կողմը մշտապես հայտարարել է, որ հետևում է տարածքային ամբողջականության սկզբունքին»,- այս մասին ասում է իրանագետ Վարդան Ոսկանյանը TV5-ի եթերում՝ անդրադառնալով իրանական կողմի, մասնավորապես Իրանի ԱԳՆ-ի հայտարարությանը, որ պաշտպանում են Ադրբեջանի տարածքային ամբողջականությունն ու կոչ անում դուրս բերել զորքերը գրավյալ քաղաքներից։

Վարդան Ոսկանյանը նշում է, որ Իրանի դիրքորոշումը պայմանավորված է մի քանի հանգամանքներով․Իրանը բազմազգ երկիր է և եթե այսօր խոսի ազգերի ինքնորոշման իրավունքից, ապա Իրանի հյուսիսը կարող է «ինքնորոշվել»։

«Դա մի տարածք է, որը ադրբեջանական քարոզչությունը կոչում է հարավային Ադրբեջան։ Եվ այս համատեքստում իրանցիները որևէ կերպ և երբևիցե չեն շեշադրելու ազգերի ինքնորոշման հանգամանքը։ Մերձավոր Արևելքում էլ իրանցիները Սիրիային, Իրաքին են օժանդակում․ պետություններ, որոնք նույնպես խնդիրներ ունեն տարածքային ամբողջականության հետ»,-ասաց Վարդան Ոսկանյանը։

Ադրբեջանի պարագայում, իրանագետի խոսքերով, տարածքային ամբողջականությունը երբևիցե չի նշանակում Արցախի ներկայություն դրա շրջանակներում։ Արցախը խորհրդային միությունից անկախացել է այնպես, ինչպես Ադրբեջան հորջորջվող արհեստածին կազմավորումը, և իրանցիները սա քաջ գիտակցում են։ Նույնիսկ այդ հայտարարության ձևակերպումների մեջ որևէ անհանգստացնող խնդիր չկա»,-ասաց Վարդան Ոսկանյանը։