Ձեր վստահելի աղբյուրը

Արցախում վիրավորների մեծ մասը միջին ու թեթև ծանրության են: Ասուլիսում այս մասին ասաց ՀՀ առողջապահության նախարար Արսեն Թորոսյանը:

«Ծանր և ծայրահեղ վիրավորներ էլ ունենք, փոքր տոկոս են կազմում: Նրանք առավել ուշադրություն են պահանջում, նրանց են ուղղված բժշկական հաստատությունների ամենամեծ ուշադրությունը, որպեսզի նրանց կյանքին վտանգ չսպառնա ու փրկվեն:

Ծանր և ծայրահեղ ծանր վիրավորները քիչ են, քանի որ, դժբախտաբար, նաև ծանր վիրավորումներից մինչև բժշկական հաստատություններ հասնելը որոշ զինծառայողներ մահանում են»,- նշեց նա: 

Նախարարն ասաց, որ վիրավորների մասին տեղեկության բացը լրացնելու մասին խնդրին ծանոթ են, այդ հարցը այսօր կամ վաղը վերջնականապես կկանոնակարգվի. «Լինելու է թեժ գիծ, որով հնարավոր կլինի պարզել այս կամ այն վիրավոր զինծառայողի գտնվելու վայրը, բայց հիմնականում գիտակցության մեջ գտնվող ծառայողները կարողանում են կապ հաստատել հարազատների հետ։ Քիչ դեպքեր են լինում, որ անճանաչելի վիրավոր ենք ունենում, քանի որ սկզբում անգիտակից են լինում: Նրանց մասով ճանաչման պրոցեսը մի փոքր այլ է, մենք և ՊՆ  զբաղվում ենք այդ հարցով»:

Ա.Թորոսյանն ասաց, որ Արցախում գտնվող բոլոր հիվանդանոցային հաստատությունների համար ունեն պահեստային պլաններ ծառայություններ կազմակերպման համար:

Նա նշեց, որ ՀՀ առողջապահական համակարգը փաստացի  բաժանված է երեք հիմնական մասի՝ սովորական առողջապահական համակարգ, որ խաղաղ ժամանակ աշխատում է, Կովիդի դեմ պայքարի առողջապահական  համակարգ, որը դեռ  պայքարում է այդ գլոբալ խնդրի դեմ, երրորդ՝ քաղաքացիական և զինվորական վիրավորներին բուժօգնություն ցույց տվող համակարգ: 

«Նաև ինչով է այս կոնֆլիկտը բեռ առողջապահական համակարգի վրա,  որ նման պանդեմիայի շրջանում նման սրացում է տեղի ունենում, ագրեսիա բնակչության նկատմամբ, այն դեպում երբ բոլոր միջազգային կազմակերպությունները վաղուց կոչ էին արել զերծ մնալ սրացումներից մինչև այս գլոբալ մարտահրավերի դեմ ողջ մարդկությունը կպայքարի»:

Ա. Թորոսյանն ասաց, որ Հայաստան տեղափոխված ագրեսիայի ենթարկված բոլոր քաղաքացիներին ՀՀ կառավարությունը տրամադրում է հնարավոր ամենամեծ առողջապահական փաթեթը, հատուկ կառավարության որոշում է ընդունվել: Կազմակերպել են խոցելի պացիենտների խմբակային տեղափոխում Հայաստան,  հոգեկան առողջության խնդիրներ ունեցող քաղաքացիները Սևանի հոգեկան առողջության կենտրոնում են հիմա բուժում ստանում, տասնակից ավելի հեմոդիալիզ ստացող քաղաքացիներ են տեղափոխվել Հայաստան
Նախարարն ասաց, որ ՀՀ տեղափոխված խաղաղ բնակչության առողջապահական ամբողջ ծառայությունները կրկին հոգ է  տանում ՀՀ կառավարությունը:

Նա նշեց, որ անհապաղ լուծման անհրաժեշտ սարքերի կարիք որպես այդպիսին չկա, որովհետև իրենց ունեցած սարքերը տեղափոխվում են՝ ըստ անհրաժեշտ վայրի։

«Սակայն հաշվի առնելով գործողությունների, նժշկական սարքերի՝ ընթացքում շարքից դուրս գալը, պարագաների, դեղերի ծախսրը հնարավոր է առաջանա անհրաժեշտություն: Չսպասելով   նման անհրաժեշտության առաջացման՝ առաջանցիկ գնումներ ենք կազմակերպում, և  եթե կլինեն անհատներ կամ կազմակերպություններ, որոնք կուզենան օգնել մեզ այդ հարցում, խնդրում եմ դիմեն առողջապահության նախարարությանը, որպեսզի այդ աշխատանքը համակարգված լինի»,- ասաց Ա.Թորոսյանը: