Ձեր վստահելի աղբյուրը

«Գլխովին ջախջախվել է հակառակորդի երեք բրիգադ, մեծ թվով զրահատեխնիկա»,- այսօր ԱԺ-ում լրագրողների հետ զրույցում ասաց ՀՀ ՊՆ ներկայացուցիչ Արծրուն Հովհաննիսյանը։

Նրա խոսքով, այս պահին էլ Ստեփանակերտը հրթիռակոծվում է մարտական ԱԹՍ-ներով։ Ըստ Արծրուն Հովհաննիսյանի, միջազգային որևէ պետություն, բացառությամբ Ադրբեջանի դաշնակիցների, չի կասկածում, որ ահաբեկչական կազմակերպություններ են ներգրավված պատերազմում։

ՊՆ ներկայացուցիչը նշեց, որ ՊԲ-ն հաջողություններ ունի հյուսիսային ուղղությամբ, դիրքեր է գրավել։

«Հակառակորդը փորձում էր զարգացնել հարձակումը, այսօր գլխովին ջախջախվել ու դուրս է շպրտվել հարձակողական բնագծերից։ Սա մեզ համար ոգևորող է։ Բայց պատերազմ է, ծանր պատերազմ, և իրավիճակներ կան, որ կարող են լինել մեծ հաջողություններ, դեպքեր էլ կան, որ նահանջներ ու թևանցումներ են լինում։ Բայց և վստահ եղեք՝ հաղթանակը մերն է լինելու»,- շեշտեց նա։

Արծրուն Հովհաննիսյանը նկատեց՝ մեր զինուժը շարունակում է իր հաջողությունների շղթան, մեր բանակն իր խնդիրը կատարում է։

«Երբ խոսվում է Ադրբեջանի ամբողջ զինված ուժերի՝ ներառյալ ծովուժի և հատուկ ծառայությունների  ամբողջ ուժերի միասնաբար հարձակման մասին, ու դու դա դուրս ես շպրտում, մեկ-երկու դիրքերի հետ-առաջը ոչինչ չի փոխում։ Երբ դիմացդ գալիս է 200-300 տանկ, պարզ է, որ դրանց խնդիրը տասնյակ կմ-ներ են, ոչ  թե մեկ-երկու կմ։ Մենք այսօր շատ հստակ նշեցինք, որ Իրանի սահմանը կարող է վտանգվել, երբ հակառակորդին ջախջախում ենք, փախնում են այդ տարածք։ Մենք շատ ուրախ ենք, որ Իրանը դա շատ լավ գիտակցում է։ Մենք ուրախ ենք, որ կրկնվելու դեպքում Իրանը համապատասխան քայլեր կձեռնարկի և ոչ միայն քաղաքական»,- շեշտեց նա։

Արծրուն Հովհաննիսյանը նշեց, որ հայ-ադրբեջանական սահմանին հարաբերական հանգիստ է։