Ձեր վստահելի աղբյուրը

«Հակառակորդը մեծ կորուստներ է տվել մի շարք հատվածներում, նրա մեծածավալ հարձակման փորձը լիակատար ձևով ձախողվել է: Մեծ ստորաբաժումներ են վերացվել»,- ասուլիսում ասաց   Արցախի Հանրապետության նախագահի արտաքին հարցերով խորհրդական Դավիթ Բաբայանը:

Նա նշեց, որ շարունակվել է հակառակորդի կողմից ահաբեկչական գործողությունը, թշնամին ողջ գիշեր  հրթիռակոծել ու ռմբակոծել է Ստեփանակերտը, մի շարք բնակավայրեր, գյուղեր, քաղաքներ: Կան ավերածություններ, տուժածներ: Ըստ նրա, համառ մարտերը շարունակվում են, կան տեղեր, որտեղ համեմատաբար ավելի հանգիստ են, կան տեղեր, որտեղ ակտիվությունը շարունակվում է:

«Բայց որևէ  ձևով մեր ժողովուրդն իր կամքը, վճռականությունը չի կորցրել: Կանգնելու ենք մինչև վերջ: Այսօրվա դրությամբ տեսնում ենք, որ ակտիվանում է միջազգային ներգրավածությունը և այն գործընթացները, որին ականատես ենք լինում, թույլ է տալիս կանխատեսելու, որ մոտ ապագայում, շատ շուտ կլինի ավելի մեծ ճնշումներ Թուրքիայի և Ադրբեջանի վրա:

Իհարկե, ամենամեծ ճնշումը տվյալ դեպքում և այսպես կշարունակվի պաշտպանության բանակի ու Հայոց բանակի գրագետ ու ճիշտ գործողություններն են ռազմի դաշտում»,- ասաց Դավիթ Բաբայանը:

Նա ընդգծեց, որ Ստեփանակերտը կա և կլինի, պետք է լծվել համբերությամբ, որևէ խուճապային տրամադրություն չլինի, ինչը միայն վնասելու է մեզ, ինչի ուղղությամբ աշխատում է հակառակորդը: 

Դ.Բաբայանն ասաց, որ թշնամին թիրախավորում է  բացառապես քաղաքացիական օբյեկտներ, ինչը ռազմավարություն է, իրենց փիլիսոփայությունն է՝ այսինքն ահաբեկել, ոչնչացել քաղաքացիական օբյեկտները, դպրոցները, մանկապարտեզները, փորձում են կոտրել հայ ժողովրդի կամքը:

«Չի ստացվում: Ինչքան նման պահվածք են ցուցաբերում, այնքան ավելի կարծր ենք դառնում: Ինչ արեցին Ալիևն ու Էրդողանը, մեծ հարված հասցրեցին նաև բանակցային գործընթացին, ձևաչափին, ամեն ինչին: Այսպիսի հանցագործությունների համար անպայման պետք է կրեն պատիժ, ցանկալի է, որ այդպիսի պատիժը լինի միջազգային դատարանում։ Որովհետև եթե մի երկիր, լինելով ՆԱՏՕ-ի անդամ, համագործակցում է ահաբեկիչների հետ՝ առանց տեղյակ պահելու իր գործընկերներին, մտնում է պատերազմ, փաստորեն վտանգում է ողջ աշխարհը երրորդ համաշխարհային պատերազմով, այդ երկիրը պետք է կրի պատասխանատվություն»,- ասաց Դ.Բաբայանը:

Նրա խոսքով, այն, ինչ հիմա անում է Արցախն ու Մայր Հայաստանը, պայքար է ողջ քաղաքակիրթ աշխարհի համար:

«Այստեղ է վճռվում Փարիզի, Լոնդոնի, Վաշինգտոնի, Մոսկվայի, Թեհրանի, Պեկինի, Դելլիի ճակատագիրը մոտակա տարիների  ընթացքում, որովհետև  Թուրքիայի և Ադրբեջանի հանցավոր քաղաքականության նպատակը ոչ միայն Արցախն ու Հայաստանն է: Եթե հասնեն իրենց նենգ ու անմարդկային նպատակներին, ապա Բոսֆորից մինչև Վոլգա կստեղծվի ահաբեկչական խալիֆայություն, կսկսվի ներթափանցումը Արևմտյան Եվրոպա և Ամերիկա: Սա լավ հասկանում ենք, տեսնում ենք, որ մեծ տերությունների միջև անկախ բարդ փոխհարաբերություններից, կա  կոնսոլիդացված  մոտեցում տվյալ հարցում: ՌԴ-ի, ԱՄՆ-ի և Ֆրանսիայի նախագահների վերջին հայտարարությունը ևս մեկ անգամ դա ապացուցում է: Տեսնում ենք, որ ուժեղանում է տարբեր երկրների վճռականությունը՝ արդեն անմիջական հարվածներ հասցնելու ահաբեկիչներին։

Այն փաստը, որ ՌԴ հետախուզությունը հրապարակել է պաշտոնական տեղեկություն, որտեղ նշվում է ահաբեկիչների Ռուսաստան ներթափանցման մեծ վտանգը, և որ նրանք պատրաստվում են հարվածել Սիրիայում ահաբեկիչների հենակետերին, սա նշանակում է, որ համաշխարհային կոալիցիայի աշխատանքը նոր որակ են ստանում, որովհետև եթե այսօր հարվածում են Սիրիայում ահաբեկիչներին, վաղը 100 տոկոս հարվածելու են մեր տարածաշրջանում տեղակայված ահաբեկիչների ճամբարներին, ինչն ինքնին ցույց է տալիս, որ միջազգային հանրության քայլերն ու դիրքորոշումն արդեն նոր որակ են ստանում»,- նշեց քաղաքական գործիչը:

Նա նաև ասաց, որ Վրաստանը նույնպես դառնալու է ահաբեկչության և պանթուրքիզմի թիրախ:

«Մենք պայքարում ենք նաև Վրաստանի համար, որ վաղը  իրենք չդառնան թիրախ: Իսկ իրենք եթե թիրախավորվեն, դա լինելու է վրաց պետականության վերջը, եթե մենք այստեղ չկարողանանք մեր առաքելությունը կատարել այնպես, ինչպես  որ պետք է: Սրա մասին մենք պետք է խոսենք, որովհետև վրաց ժողովրդին մենք ընդունում ենք բարեկամ ժողովուրդ»,- ասաց Դ.Բաբայանը: