Ձեր վստահելի աղբյուրը

«Ամեն օր մենք ՄԻԵԴ ենք ներկայացրել փաստեր ու ապացույցներ Ադրբեջանի կողմից թե կոնվենցիոն, թե մարդասիրական իրավունքների խախտումների մասին»,- տեղեկատվական կենտրոնում հայտարարեց ՄԻԵԴ-ում Հայաստանի ներկայացուցիչ Եղիշե Կիրակոսյանը։

Հիշեցնենք, որ ՄԻԵԴ-ը սեպտեմբերի 29-ին Ադրբեջանի նկատմամբ միջանկյալ միջոց կիրառելու վերաբերյալ որոշում էր ընդունել՝ կոչ անելով Հայաստանին ու Ադրբեջանին չթիրախավորել քաղաքացիներին ու քաղաքացիական օբյեկտները, բնակավայրերը։

«Մինչև երեկ, այսօր էլ կարծում եմ, կուղարկվի թարմացում Ադրբեջանի կողմից տոտալ անտեսումը թե մարդասիրական իրավունքների, թե կոնվենցիոն պահանջների, թե մարդու իրավունքների վերաբերյալ նվազագույն չափանիշների խախտումների մասին»,- ասաց Կիրակոսյանը՝ մատնանշելով Արցախի մայրաքաղաք Ստեփանակերտի ու այլ բնակավայրերի անընդհատ գնդակոծությունները։

Հաշվի առնելով տարբեր երկրների ԱԳ նախարարությունների կողմից հստակ հայտարարությունները՝ ԼՂ-ի դեմ պատերազմում Թուրքիայի մասնակցության վերաբերյալ, ինչպես նաև երեկ Ռուսաստանի արտաքին հետախուզության ծառայության ղեկավարի հայտարարությունը Լիբիայի ու Սիրիայի տարածքից վարձկանների ու ահաբեկիչների տեղափոխման ու ռազմական գործողությունների մասնակցելու վերաբերյալ՝ Հայաստանը նաև հայց-խնդրանք  է ներկայացրել դատարանին Թուրքիայի նկատմամբ միջանկյալ միջոց կիրառելու վերաբերյալ։ Կիրակոսյանն ասաց, բոլոր ապացույցները, փաստերը, այդ թվում՝ Նարիշկինի հայտարարությունը կցվել են հայցին։

«Մենք արդեն ստացել ենք դատարանի որոշումը, որով հղում է կատարվում սեպտեմբերի 2-ի որոշմանը, կոչ է անում պետություններին, այդ թվում Թուրքիային զերծ մնալ գործողություններից։ Ինքնին պարզ է, որ որոշումը կայացվել է Հայաստանի կողմից ներկայացվածների ապացույցների հիման վրա, այն չի ուղարկվել Թուրքիայի կառավարությանը մեկնաբանության համար։  Հաշվի առնելով դա՝ պարզ է, որ խոսքը գնում է կոնկրետ Թուրքիայի ներգրավվածության մասին»,- ասաց նա։

Կիրակոսյանը նշեց, որ հետողական են լինում այդ որոշումներով կատարված քայլերին։

«Մինչ այս պահը մենք Ադրբեջանից որևէ ինֆորմացիա չենք ստացել, դատարանին որևէ թարմացում չի ներկայացրել, թե ինչ քայլեր է ձեռնարկել։ Հիմնվելով դատարանի կանոնների վրա՝ խնդրել ենք դատարանին, որպեսզի ակտիվ քայլեր ձեռնարկի այդ ուղղությամբ, հաջորդ քայլը, համաձայն կանոնների, հարցը պետք է տեղափոխվի նախարարների կոմիտե, որտեղ ակտիվ քննարկման կարող է դրվել։ Նույնը վերաբերում է Թուրքիայի նկատմամբ կայացրած որոշման կիրառմանը»,- ասաց ՄԻԵԴ-ում Հայաստանի ներկայացուցիչը։