Ձեր վստահելի աղբյուրը

Վրաստանի գլխավոր դատախազությունը Ադրբեջանի հետ սահմանի սահմանազատման և սահմանագծման հանձնաժողովի աշխատանքների ընթացքում երկրի տարածքի մի մասի ապօրինի հանձնման վերաբերյալ քրեական գործի շրջանակներում բերման է ենթարկել Արտաքին գործերի և ՆԳՆ երկու աշխատակիցների: ՏԱՍՍ-ի փոխանցմամբ, այս մասին չորեքշաբթի ճեպազրույցում ասել է դատախազ Ջարջի Ցիկլաուրին:

Դատախազի խոսքով, դեռ 1994 թ.-ին երկու երկրների իշխանությունները համաձայնել էին երկրները սահմանազատել 1938 թվականին հրապարակված քարտեզի համաձայն, բայց գործով ներգրավված անձինք այն դիտավորյալ թաքցրել են և առաջնորդվել 1970-80-ականներին տպագրված քարտեզներով:

«Քննությունը պարզեց, որ սահմանի սահմանազատման մեջ մեղադրվողներն առաջնորդվում էին 1970-1980 թվականներին հրատարակված քարտեզներով, որոնք էապես հակասում են մեր երկրի պատմական սահմանին, այդ թվում նաև Դավիթ-Գարեջիի (սահմանին վրացական վանական համալիր) առնչությամբ»,- ասել Ցիկլաուրին:
Ինչպես նշել է դատախազը, խոսքը վերաբերում է 1996-ից 2007 թվականներին հանձնաժողովի իրականացրած աշխատանքին: Դեռ հայտնի չէ, թե ո՞րն է եղել մեղադրյալների դրդապատճառը:

Վրացի լրագրողներին հաջողվել է պարզել, որ բերման են ենթարկվել վրացական կողմից սահմանի գծանշման հանձնաժողովի նախկին ղեկավար Իվերի Մելաշվիլին և հանձնաժողովի նախկին անդամ Նատալիա Իլիչևան:

Մեղադրյալի դեմ քրեական գործ է հարուցվել «Վրաստանի տարածքային անձեռնմխելիության խախտում» հոդվածով, որով սահմանվում է 10-ից 15 տարի ազատազրկում: Դատախազությունը շուտով կդիմի դատարան՝ որպես խափանման միջոց կալանավորվածների նկատմամբ ազատազրկում ընտրելու միջնորդությամբ:

Վրաց-ադրբեջանական պետական սահմանի սահմանազատման աշխատանքներն իրականացվում են 1996 թվականից: Սահմանի ընդհանուր երկարությունը 480 կմ է, որից համաձայնեցված է 314 կմ: 2019-ի մայիսին սահմանների սահմանազատման և սահմանազատման հարցերով համատեղ հանձնաժողովը մի քանի տարի տևած ընդմիջումից հետո վերսկսեց աշխատանքը: Սահմանի վիճելի հատվածներից մեկը երկու երկրների միջեւ գտնվող Դավիթ-Գարեջի վանական համալիրն է, որը բաղկացած է ժայռերի մեջ փորագրված քարանձավներից: Համալիրի մի մասը գտնվում է Ադրբեջանի տարածքում, մի մասը ՝ Վրաստանի տարածքում, որը պարբերաբար դառնում է տարածքային վեճերի առարկա: