Ձեր վստահելի աղբյուրը

Լեռնային Ղարաբաղում հակամարտության գոտում վիրավորված ռուս լրագրողները կտեղափոխվեն Երևան, նրանցից մեկն այժմ ծանր վիճակում է։  ՏԱՍՍ-ին այս մասին ասել է ՌԴ ԱԳՆ պաշտոնական ներկայացուցիչ Մարիա Զախարովան։

«Երևանում Ռուսաստանի դեսպանատունը կապի մեջ է Հայաստանի արտգործնախարարության հետ ՝ հակամարտության գոտում ռուս լրագրողների վիրավորվման հետ կապված: Մեր տեղեկություններով, նրանցից մեկը գտնվում է ծանր վիճակում, նրան վիրահատում են: Նրանցից երկուսը միջին ծանրության վնասվածք ունեն և շուտով նույնպես կվիրահատվեն: Հենց նրանք բոլորը տեղափոխման ենթակա կլինեն, նրանց կհասցնեն Երևան»,- նշել է նա։

Հիշեցնենք, որ այսօր Ադրբեջանի կողմից Շուշիի Ղազանչեցոց եկեղեցու թիրախավորման հետևանքները լուսաբանելու ընթացքում վիրավորվել է ռուսաստանցի երեք լրագրող։

Հիշեցնենք՝  սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։ Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, Մարտունին, Մարտակերտը, Հադրութը: Բնակչությանը կոչ է արվել պատսպարվել։ Կան տասնյակից ավելի զոհեր քաղաքացիների և հարյուրավոր զոհեր զինծառայողների շրջանում:

Թե Հայաստանում, թե Արցախում հայտարարված է ռազմական դրություն և ընդհանուր զորահավաք։