Ձեր վստահելի աղբյուրը

«Ռազմական գործողությունները դադարած չեն, դրանք շարունակվում են։ Իսկ այս այցն ունի երեք հիմնական կոմպոնենտ՝ հումանիտար նպատակով ռազմական գործողությունների դադարեցում, դիակների և գերիների փոխանակում»,- այսօր խորհրդարանում ասաց ԱԺ «Իմ Քայլը» խմբակցության պատգամավոր Ռուբեն Ռուբինյանը՝ անդրադառնալով Հայաստանի և Ադրբեջանի արտգործնախարարների այսօրվա մոսկովյան հանդիպմանը։

Նրա խոսքով, հստակ չէ, թե քանի օրով կարող է լինել հրադադարը, որևէ դետալ ընդգծված չէ։ Պատգամավորը տեղեկացրեց, որ չկա ֆիքսված թիվ, թե քանի օրով է լինում հումանիտար նպատակ հետապնդող հրադադարը, և կարող է պատահել, որ որևէ համաձայնություն չլինի, և ռազմական գործողությունները շարունակվեն։

Հարց. Հանդիպմանը լինելո՞ւ է գերիների (եթե այդպիսիք կան) փոխանակման հարց։

Ռ. Ռուբինյան. Այո, կոմպոնենտներից մեկը հենց գերիների փոխանակմանն է վերաբերում։

Հարց. Իսկ հնարավո՞ր է, որ հումանիտար հրադադարին հաջորդի հրադադարը։

Ռ. Ռուբինյան. Իհարկե հնարավոր եմ համարում, բայց հնարավոր է, որ չհաջորդի։ Հնարավոր է նաև, որ հումանիտար հրադադար էլ չլինի։ Այսինքն՝ պետք է սպասենք հանդիպման արդյունքներին։

Հարց. «Ալ Ջազիրային» տված հարցազրույցում Իլհամ Ալիևն ասել էր, որ Նիկոլ Փաշինյանի հետ բանակցությունները ձևական բնույթ են կրել, իսկ օրինակ, նախորդ իշխանությունների հետ բավականին առաջընթաց կար։

Ռ. Ռուբինյան. Եթե ես պատասխանեմ այս հարցին, ստիպված կլինեմ ընկղմվել ներքաղաքական քննարկումների մեջ, բայց կարծում եմ՝ դա տեղին չէ։

Հարց. Իսկ այս ամենից հետո պե՞տք է փոխվի բանակցությունների տրամաբանությունը։

Ռ. Ռուբինյան. Կարծում եմ, որ ադրբեջանա-թուրքական այս հարձակումից հետո աշխարհը պետք է ի վերջո սկսի մտածել Արցախի անկախությունը ճանաչելու ուղղությամբ։ Փորձը ցույց է տվել, որ դա միակ ճանապարհն է կայուն կերպով երաշխավորելու Արցախի ժողովրդի ֆիզիկական անվտանգությունը։ Եթե նկատել եք՝ վարչապետ Փաշինյանի վերջին հարցազրույցներում  այս միտքը հնչում է ավելի ու ավելի հաճախ։ Ընդհանուր առմամբ, Ղարաբաղյան հակամարտության վերաբերյալ միջազգային ընկալումները էապես փոխվել են, և մեծ դիվանագիտական աշխատանք կա անելու և՛ հիմա, և՛ ապագայում։Արցախի ճանաչումը պետք է մեր օրակարգում թիվ մեկ հարց դառնա։

Հարց. Երկու օր առաջ Ռուսաստանի արտաքին հետախուզության ծառայության ղեկավարն էլ էր անդրադարձել տարածաշրջանում առկա ահաբեկիչների հարցին։ Ըստ էության, պաշտոնական Մոսկվան արձանագրեց այն, որ ինչը հայկական կողմն ավելի վաղ էր բարձրաձայնել։ Հիմա այս առնչությամբ ի՞նչ գործնական քայլեր պետք է արվեն, արդյո՞ք չեն ուշանում դրանք։

Ռ. Ռուբինյան. Հայկական կողմը սրա մասին պատերազմից շաբաթներ առաջ արդեն հայտարարում էր։ Ոչ միայն Ռուսաստանն է ճանաչել այդ փաստը, այլ նաև Ֆրանսիան ու Իրանը։ Կարևոր է ֆիքսել, որ Արցախը և Արցախի անվտանգության երաշխավոր Հայաստանը հակատեռորիստական պայքար են վարում։ Եվ, կարծում եմ, սա նույնպես դիվանագիտական աշխատանքի մի մաս է։

Հարց. Պատերազմի այս օրերին Արցախը բավականին կոշտ հայտարարում է, որ ինքը ևս պետք է լինի բանակցությունների կողմ։ Այս առումով մենք ի՞նչ ենք անելու։

Ռ. Ռուբինյան. Դա վաղուց է մեր պնդումը։ Բայց ես կարծում եմ, որ այս պահին բանակցությունների մասին խոսելն անիմաստ է։ Նախ պետք է դադարի պատերազմը, նոր եթե լինի համապատասխան մթնոլորտ, գուցե կարելի է մտածել բանակցությունների մասին։

Հարց. Խոսվում է հակաահաբեկչական կոալիցիայի անհրաժեշտության մասին, այս պահին այդ ուղղությամբ գործուն քայլեր կատարվո՞ւմ են միջազգային հանրության կողմից։

Ռ. Ռուբինյան. Կարծում եմ, որ տարբեր կազմակերպություններ, պետություններ ու կառավարություններ հաստատել են հակամարտության գոտում տեռորիստների առկայության փաստը։ Դա արդեն իսկ դրական տեղաշարժ է։