Ձեր վստահելի աղբյուրը

«Մենք ունենք հստակ տվյալներ, որ Ստեփանակերտի ուղղությամբ օգտագործվել է բարձր ճշգրտության՝ նաև բալիստիկ հրթիռներ, նաև՝ բնակելի շենքերի ուղղությամբ, ինչի հետևանքով բազմաթիվ զոհեր ու վիրավորներ ենք ունեցել»,- մամուլի ասուլիսում հայտնեց Արցախի մարդու իրավունքների պաշտպան Արտակ Բեգլարյանը:

Օմբուդսմենի խոսքով, ադրբեջանական զինված ուժերի մոտ ընդգծված միտում է եղել հարվածել նաև քաղաքացիական բնակչությանը՝ կորուստներ պատճառելու նպատակավ, քանի որ շատ դեպքերում օգտագործվել է լայն աղդեցության զիանատեսակներ՝ նաև կասետային հրթիռներ, ռումբեր և արկեր: Բեգլարյանը ներկայացրեց հրադադարից հետո գիշերը Ստեփանակերտի վրա օգտագործված «Սմերչ» տեսակի կասետային հրթիռի հարվածի դեպքը: Նա հայտարարեց, որ օգտագործվող ռումբերն այնպիսին են, որ նրանց պայթուցիկ մասերը կարող են երկար ժամանակ մնալ տվյալ տարածքում և հետագայում հումանիտար աղետի պատճառ դառնալ, երբ քաղաքացիներն անզգուշությամբ դիպչեն դրանց, ինչպես ինքն է փոքր տարիքում ադրբեջանական նռնակից վիրավորվել և կորցրել տեսողությունը:

Արտակ Բեգլարյանը նաև անդրադարձավ լրագրողներին թիրախային հարձակման դեպքերին: Նա հիշեցրեց, որ  Մարտունի քաղաքի հրետակոծության ժամանակ թիրախային հարձակման էր ենթարկվել  լրագրողների խումբը, որի հետևանքով 4 զոհ է եղել քաղաքացիական բնակչության շրջանում, իսկ վիրավորների մեջ եղել էին 4 լրագող: Լրագրողների դեմ թիրախային հարձակումներ են եղել նաև Մարտակերտում և Շուշիում, վերջին դեպքում վիրավորվել են նաև ռուս լրագրողները:

Արտակ Բեգլարյանը շեշտեց, որ հրթիռային հարվածների ժամանակ օգտագործվում են ԱԹՍ-ներ և ադրբեջանցիները տեսնելով մամուլի տարբերանշաններով մեքենաները և տեսախցիկները՝ միտումնավոր հարվածել են: Նրա խոսքով,  լրագրողները օբյեկտիվ, իրավապաշտպան գործունեություն են իրականացնում և նրանց թիրախավորելու հիմնական պատճառն էլ այն է, որ վախ առաջացնեն, որպեսզի վերջիններս չգան և չլուսաբանեն Արցախում կատարվողը, իսկ իրենք շարունակեն իրենց վայրագությունները: 

Արցախի Մարդու իրավունքների պաշտպանը հայտնեց, որ արդեն բաց և փակ բազմաթիվ աղբյուրներից տեղեկություններ ունեն, որ ադրբեջանական ԶՈՒ ներքո գնտնվում են հայ զինծառայողների առնվազն մարմիններ և որոշակի ապացույցներ կան որ նրանց մարմինների հանդեպ ոտնձգություններ են կատարել, որոնք խստագույնս արգելված են միջազգային մարդասիրական իրավունքով:

Բեգլարյանը նկատեց, որ ինքն այս հարցը բարձրաձայնում է, որպեսզի միջազգային հանրության ճնշումների միջոցով կանխարգելվեն այդպիսի ոտնձգությունները և վայրագություները և նման դեպքերի արձանագրման դեպքում համապատասխան պատիժ սահմանվի միջազգային հանրության կողմից: Նա հիշեցրեց, որ նմա դեպքեր եղել են 2016 թվականի ապրիլյան պատերազմի ժամանակ, երբ զինծառայողները, քաղաքացիները  կամ դիակներն ադրբեջանցիների մոտ հայտնվելուց խոշտանգվել են, կամ դիակապտության ենթարկվել:

«Այդ ռիսկը մեծ է, քանի որ նման դեպքերը Ադրբեջանի իշխանությունների կողմից մշտապես ողջունվել ու հերոսացվել են»,-հայտարարեց Արտակ Բեգլարյանը և շեշտեց, որ ինքը կաջակցի, որպեսզի դիակները փոխանակվեն:

Արցախի օմբուդսմենը տեղեկացրեց, որ արդեն հաշվարկվել է մասնավոր գույքի վնասման  5800 դեպքեր: