Կրեմլը պնդում է, որ կարևոր է Ղարաբաղի վերաբերյալ ձեռք բերված փոխհամաձայնություններին հավատարիմ մնալը. Պեսկով

Քաղաքական 14:58 12/10/2020 Տարածաշրջան

Կրեմլը պնդում է, որ կարևոր է Ղարաբաղի վերաբերյալ ձեռք բերված փոխհամաձայնություններին հավատարիմ մնալը. Պեսկով

Կրեմլը չափազանց կարևորում է Լեռնային Ղարաբաղի վերաբերյալ ձեռք բերված պայմանավորվածությունների կատարումը, որպեսզի դրանից հետո հակամարտող կողմերը լիովին հրաժարվեն ռազմական գործողություններից և անցնեն կարգավորման դիվանագիտական միջոցների:

«Մենք բարձր ենք գնահատում փոխըմբռնման համաձայնությունը՝ հումանիտար դադարի մասին որոշումը, որը ձեռք է բերվել Ռուսաստանի Դաշնության, Ադրբեջանի և Հայաստանի արտաքին գործերի նախարարների շփումներից հետո»,- ՏԱՍՍ-ի փոխանցմամբ, երկուշաբթի լրագրողներին ասել է ՌԴ նախագահի մամուլի քարտուղար Դմիտրի Պեսկովը:

Նա շեշտել է, որ Մոսկվան այժմ շատ ուշադիր հետեւում է իրավիճակին և տեսնում է երկու կողմերից եկող հաղորդումները:

«Մենք կարծում ենք, որ ձեռք բերված պայմանավորվածությունների իրականացումը չափազանց կարևոր է՝ ռազմական գործողություններից լիովին հրաժարվելու և հետագայում հակամարտությունը լուծելու քաղաքական և դիվանագիտական միջոցների անցնելու համար»,- ասել է Կրեմլի խոսնակը:

«Մենք բարձր ենք գնահատում երկու նախարարների ժամանման փաստը, ովքեր արձագանքեցին նախագահ Վլադիմիր Պուտինի նախաձեռնությանը և եկան Մոսկվա: Նաև բարձր ենք գնահատում այն աշխատանքը, որը կատարեցին նախագահներ Պուտինը, Ալիևը և վարչապետ Նիկոլ Փաշինյանը»,- ասել է Պեսկովը:

Նա հավելել է, որ այդ աշխատանքների արդյունքը եղավ Ռուսաստանի արտգործնախարար Սերգեյ Լավրովի, Հայաստանի և Ադրբեջանի նրա գործընկերների մի քանի ժամ տևած բանակցությունները:

Հոկտեմբերի 9-ին Մոսկվայում ռուսական կողմի նախաձեռնությամբ անցկացված խորհրդակցությունների արդյունքում Ադրբեջանը և Հայաստանը պայմանավորվել են մարդասիրական նպատակներով տեղական ժամանակով ժամը 12:00-ից հրադադար հաստատել` գերիների և մահացածների մարմինների փոխանակման համար:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: