Ձեր վստահելի աղբյուրը

ՀՀ վարչապետ Նիկոլ Փաշինյանը ՀՀ-ում հավատարմագրված դեսպանների հետ հանդիպմանը տեղեկացրել է  ղարաբաղյան հակամարտության շուրջ ստեղծված իրավիճակի մասին, տվել  իր գնահատականները տեղի ունեցողին, տարբեր կողմերի գործողություններին, շնորհակալություն է  հայտնել ԵԱՀԿ Մինսկի խմբին, մասնավորապես ՌԴ նախագահին՝ կրակը դադարեցնելու ուղղությամբ գործադրվող ջանքերի համար: Հանդիպումից հետո լրագրողների հետ զրույցում ասաց ՀՀ-ում ՌԴ դեսպան Սերգեյ Կոպիրկինը։

Նա ասաց, որ հանդիպմանը ղարաբաղյան հակամարտության գոտի խաղաղապահներ բերելու մասին խոսք չի եղել։

Հարցին՝ կրակի դադարի ռեժիմը չի պահպանվում, ի՞նչ պետք է անել նման իրավիճակում, դեսպանը պատասխանեց, որ պետք է հասնել  նրան, որ պահպանվի, ինչպես կողմերը պայմանավորվել էին Մոսկավում հոկտեմբերի 9-ին։ Նա նշեց, որ ՌԴ դիրքորոշումն է՝ հասնել նրան, որպեսզի ռազմական գործողությունները դադարեն,  ՌԴ-ն անում է ամեն ինչ իր ուժերի սահմանում, որպեսզի դա տեղի ունենա։

«Ռուսաստանն անում է ամեն ինչ, որ հրադադարի ռեժիմը իրականում գործի: Անձամբ Ռուսաստանի նախագահ Վլադիմիր Պուտինի և ռուս դիվանագետների կողմից ակտիվ ջանքեր են գործադրվում բախումները դադարեցնելու ուղղությամբ։ Մենք կապի մեջ ենք բոլոր կողմերի հետ», - ասաց դեսպանը։

Հարցին՝ Արցախի Հանրապետության անկախության ճանչաման վերաբերյալ ի՞նչ դիրքորոշում ունի Ռուսաստանը, դեսպանը պատասխանեց, որ Ռուսաստանի դիրքորոշումն այն է, որ անհրաժեշտ է դադարեցնել ռազմական գործողությունները, որպեսզի մարդիկ չմահանան, անհրաժեշտ է  վերադառնալ բանակցային սեղան ու առարկայական բանակցություններ վարել ԵԱՀԿ Մինսկի խմբի հովանու ներքո:

Հիշեցնենք՝ սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։ Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, Մարտունին, Մարտակերտը, Հադրութը, Շուշին: Բնակչությանը կոչ է արվել պատսպարվել։ Կան երկու տասնյակից ավելի զոհեր քաղաքացիների և հարյուրավոր զոհեր զինծառայողների շրջանում:

Թե Հայաստանում, թե Արցախում հայտարարված է ռազմական դրություն և ընդհանուր զորահավաք։

Հոկտեմբերի 9-ին Մոսկվայում հանդիպել էին Հայաստանի, Ադրբեջանի և Ռուսաստանի արտաքին գործերի նախարարները Լեռնային Ղարաբաղում տիրող իրավիճակի շուրջ խորհրդակցություններ անցկացնելու համար։ Հանդիպումից հետո արտաքին գործերի նախարարները հանդես են եկել հայտարարությամբ, մասնավորապես հոկտեմբերի 10-ին ժամը 12:00-ից մարդասիրական նպատակներով հայտարարվում է կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար` Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։