Ձեր վստահելի աղբյուրը

«Ինքնառաջադրվել եմ, որովհետև, իմ կարծիքով, այս իրավիճակում մենք պարտավոր էինք այդ քայլը կատարել ու ընտրել Սահմանադրական դատարանի նախագահ»,- լրագրողների հետ զրույցում ասաց Սահմանադրական դատարանի նորընտիր նախագահ Արման Դիլանյանը։

Լրագրողները նրան հիշեցրեցին, որ հարցազրույցներից մեկի ժամանակ ասել էր՝ իր համար ՍԴ նախագահի պաշտոնն ամենևին գրավիչ չէ, առավել գրավիչ է ՍԴ դատավորի պաշտոնը։ Նա ասաց. «Հիմա էլ եմ այդ կարծիքին։ Ինչպես նկատում եք, այնպես չէ, որ շատ ոգևոված եմ, որ ընտրվել եմ Սահմանադրական դատարանի նախագահ։ Պատերացում եմ՝ ինչ տեսակի պատասխանատվություն, աշխատանք է մեզ սպասվում ապագայում»,- ասաց  Ա. Դիլանյանը։

Նա ասաց, որ ընտրությանը մասնակցել են  ՍԴ բոլոր 9 դատավորները, ստացել է 6 կողմ ձայն։ ՍԴ փոխնախագահի ընտրության հարցին այսօր չեն հասել։

Հարցին, թե ինչպե՞ս եք պատերացնում ձեր աշխատանքը ՍԴ դատավորներ Հրայր Թովմասյանի, Արևիկ Պետրոսյանի հետ, դուք նախկինում էլ աշխատել ենք նրանց հետ, Ա. Դիլանյանը պատասխանեց. «Իմ կարծիքով,  չկա  դժվարություն, որ չհաղթահարվի»։

ՍԴ նախագահը, ըստ օրենքի, ընտրվում է 6 տարով։ Նորընտիր նախագահն ասաց, որ սրա հետ կապված ասելիք ունի, սակայն դա կանի լրատվամիջոցների հետ մեծ հանդիպման ժամանակ։

Հարցին՝ հիմա ՍԴ–ում ճգնաժամը հանգուցալուցվե՞ց,  Ա. Դիլանյանը պատասխանեց. «Իմ հայացքներն ուղղում եմ բացառապես դեպի ապագա, գիծ եմ քաշում անցյալի հետ կապված։  Մենք ամեն ինչ անելու ենք, որ ունենանք ժողովրդի բացարձակ վստահությունը վայելող Սահմանադրական դատարան»։