Ձեր վստահելի աղբյուրը

Եվրոպայի խորհրդի  խորհրդարանական վեհաժողովի լիագումար նիստում Եվրոպայի
խորհրդի մարդու իրավունքների հանձնակատար Դունյա Միատովիչի տարեկան
զեկույցի ժամանակ ՀՀ ԱԺ պատգամավոր Միքայել Մելքումյանը  հարց է  բարձրացրել։ Այս մասին տեղեկացնում է պատգամավորը՝ ֆեյսբուքյան գրառմամբ։ 

«Պարոն Նախագահ,
Տիկին Հանձնակատար,

Շնորհակալություն զեկույցի համար: Այն շատ արդյունավետ է բոլորիս համար: 
Բայց ես այլ հարց եմ ուզում հնչեցնել:

Ի՞նչ եք կարծում, տիկին Միատովիչ, ինչպե՞ս է հնարավոր պահպանել մարդու իրավունքները պատերազմի ժամանակ, ավելի ստույգ՝ Արցախի Հանրապետությունում ընթացող պատերազմի ժամանակ: Այս պարագայում ունե՞ք համապատասխան լուծում:

Ինչու՞ եմ այս հարցը բարձրացնում. որովհետև պետք է հենց Արցախում տեսնեք, որ Թուրքիայի և Ադրբեջանի կողմից ռմբակոծությունների, նրանց ագրեսիայի հետևանքով բազում զոհեր ունենք խաղաղ բնակչության շրջանում, տասնյակ զոհեր: 

Ես Ձեզ հրավիրում եմ՝ վաղը, կամ  մյուս օրը, Հայաստանի Հանրապետություն և Արցախ: Ինչու՞: Որպեսզի տեղում ծանոթանաք իրավիճակին: Ի՞նչ հստակ լուծում կառաջարկեք: Զեկույցը, գնահատականներ տալը շատ լավ է, արդյունավետ, բայց ինչպե՞ս կանխել պատերազմը:

Այսպիսով, ասեք շատ կոնկրետ՝ ինչպե՞ս մենք պաշտպանենք մարդու իրավունքներն այս  իրավիճակում, շատ-շատ կոնկրետ ասեք, իսկ զեկույցներ, գնահատականներ տալն այս պահին չի փրկում իրավիճակը:

Տեսնենք՝ ինչ կասեք»։