Ձեր վստահելի աղբյուրը

«Վերջին շրջանում բոլորս դիտարկում ենք կորոնավիրուսի դեպքերի և հիվանդացության աճ։ Վերջին 14 օրերին այդ աճը հասնում է գրեթե 113 տոկոսի»,- ասուլիսում ասաց ՀՀ ԱՆ հիվանդությունների վերահսկման և կանխարգելման ազգային կենտրոնի ներհիվանդանոցային վարակների համաճարակաբանության բաժնի պետ Ռոմելլա Աբովյանը։

Նրա խոսքով, պատճառները պարզ են. ելնելով ռազմական դրությունից՝  բնակչության ուշադրությունը սևեռված է դեպի արտաքին թշնամին։

«Սակայն մենք չպիտի մոռանանք, որ ունենք անտեսանելի թշնամի, որն ուղղակիորեն մեր թիկունքը թուլացնում է։ Պարզ է, որ անվտանգության կանոնները չպահելու արդյունքում է գրանցվում այս ցուցանիշը»,- նշեց նա։

Ըստ նրա, ամբողջ աշխարհում արդեն իսկ ապացուցվել է, որ երեք կանոններ պահպանելով կարելի  է կանխարգելել COVID-ի տարածումy՝ կրել դիմակ, ախտահանել ձեռքերը, պահպանել սոցիալական հեռավորությունy։

Նա նշեց, որ տարբեր կամավորական ջոկատներ են ստեղծվում, հավաքագրվում օգնություններ, մարդկային կուտակումների ժամանակ որևէ մեկն անվտանգության կանոնները չի պահում։

«Անվտանգության կանոնները չպահելը կարող է բերել իրավիճակի, որ հիվանդությունը տարածվի, հասնի զինվորներին՝ դրանով թուլացնելով մեր զինվորի կամքն ու առողջությունը։ Սա զգոնության, սթափության կոչ է, պիտի միասնական ու յուրովի պայքարենք այս հիվանդության դեմ, վերահսկենք կողքի անձի կողմից այդ կանոնների չպահանման գործընթացը։ Յուրաքանչյուրս հանդիսանում ենք այս  պայքարի կանոնների պահպանման պատասխանատուն և յուրաքանյուրս պատասխանատու ենք այս հիվանդության տարածման համար»,- ասաց Ռոմելլա Աբովյանը։