Ձեր վստահելի աղբյուրը

Ռուսաստանի ռազմական գերատեսչությունը ակտիվորեն մասնակցում է Լեռնային Ղարաբաղում հակամարտության կայունացմանը։ «ՏԱՍՍ» գործակալության փոխանցմամբ, այդ մասին լրագրողներին հայտնել են պաշտպանության նախարարությունում։

«Ռուսաստանի պաշտպանության նախարարությունն իր իրավասությունների շրջանակում  ակտիվորեն մասնակցում է ՌԴ-ի՝ Լեռնային Ղարաբաղում իրավիճակի հնարավորինս շուտ կայունացման նախաձեռնության իրականացմանը»,-ասել են գերատեսչությունում։

Աղբյուրը մանրամասնել է, որ ՌԴ պաշտպանության նախարար Սերգեյ Շոյգուն  այդ հարցով բանակցություններ է վարել տարբեր երկրների իր գործընկերների հետ։

«Այդ աշխատանքների գլխավոր նպատակը Լեռնային Ղարաբաղում մարտական գործողությունների անհապաղ դադարեցումն է, հակամարտող կողմերի միջև բանակցություններ սկսելը տարածաշրջանում իրավիճակի կարգավորման համար»,-ընդգծել են նախարարությունում։

ՌԴ ՊՆ-ն հատկապես անհանգսացած է Մերձավոր Արևելքից ահաբեկչական խմբավորումների գրոհայինների՝  ԼՂ տեղափոխման մասին տեղեկություններով։ Գերատեսչությունից հայտնել են, որ Ռուսաստանի պաշտպանության նախարար Սերգեյ Շոյգուն երկուշաբթի տեղի ունեցած հեռախոսազրույցի ժամանակ այդ հարցի վերաբերյալ իր անհանգստությունն ու մտահոգությունն է փոխանցել  Թուրքիայի պաշտպանության նախարար Հուլուսի Աքարին։

Աղբյուրը հիշեցնում է, որ Սերգեյ Շոյգուն Թուրքիայի պաշտպանության նախարարի հետ հեռախոսազրույց է ունեցել հոկտեմբերի 12-ին, իսկ մինչ այդ՝ հոկտեմբերի 7-ին նա զրուցել է Հայաստանի ու Ադրբեջանի պաշտպանության նախարարների հետ։