Ձեր վստահելի աղբյուրը

«Վերջին մի քանի օրերի ընթացքում Ադրբեջանի զինված ուժերը որդեգրել են հետևյալ քաղաքականությունը՝ հետախուզադիվերսիոն գործողություններով մեծ ռազմաճակատային տարբեր բնակավայրերում արագ ներթափանցումներ և տեղեկատվական ակցիաներ իրականացնել: Դրոշներով տարբեր շենքերի վրա նկարվել, որպեսզի հոգեբանական ազդեցություն թողնեն առաջին հերթին իրենց հասարակության վրա և հետո նաև մեր հասարակության վրա»,- այսօրվա ասուլիսում ասաց ՊՆ ներկայացուցիչ Արծրուն Հովհաննիսյանը:

Նրա խոսքով, բավական երկար մարտական գործողությունների ժամանակ հարձակողական մարտերում կոտրելով սեփական  զինված ուժերի մեծ ներուժը մեծ, էական առաջընթաց ու հաջողություններ չունենալով՝ անհրաժեշտություն է առաջացել Ադրբեջանի հասարակությանը կերակրել նման տեղեկատվություններով:

«Որպեսզի ոմանք, թե´ մեր մոտ, թե´ ուրիշ երկրներում իմ ներկայացրած տեղեկատվությունը չհամարեն, որ զուտ քարոզչական բնույթի են՝ ներկայացնեմ որոշակի տվյալներ»,- հայտնեց ռազմական փորձագետը և շեշտեց, որ 14-15 օրվա ընթացքում մեկ գնդի առաջիկա խնդրի ծավալով առաջխաղացում ապահոված Ադրբեջանի 3-4 բանակային կորպուսները մեծ հաշվով գովելու բան չունեն:

Նրա խոսքով, ցանկացած  միջազգային, օտարազգի ռազմական փորձագետ, մասնագետ, ով գոնե տարրական ռազմական գիտելիքներ ունի, կհաստատի իր ասածը: 

«Դրանից հետո նրանց ոչինչ չի մնում, բացի նրանից, որ դիվերսիոն խմբերն արագ ներթափանցումներ կատարեն տարբեր բնակավայրեր, նկարվեն տարբեր շինությունների մոտ և հետո այդ շինությունները ներկայացնեն այս կամ այն գյուղի, կամ քաղաքի գյուղապետարան կամ քաղաքապետարան»,- հայտարարեց Արծրուն Հովհաննիսյանը: