Ձեր վստահելի աղբյուրը

Արցախի անկախությունը ճանաչելու պահանջով մի շարք քաղաքացիներ Երևան քաղաքում քայլերթ են իրականացնում։

«Ազատ, անկախ Արցախ» վանկարկելով՝ ակցիայի մասնակիցները Ազատության հրապարակից սկսեցին իրենց քայլերթը։

Նրանց խոսքով, Արցախի անկախության ճանաչումն այսօրեական և գերկարևոր խնդիր է, ուստի իրենք պետք է օտարերկրյա պետությունների դեսպանատների դիմաց բարձրացնեն վերոնշյալ խնդիրը։

«Մենք պետք է խնդրենք, որ այդ դեսպանատներն իրենց պետություններին հայտնեն Արցախում տեղի ունեցող պատերազմի մասին։ Արցախին պատերազմ են հայտարարել ահաբեկչական կազմակերպությունները, այդ իսկ պատճառով պետությունները պետք է ճանաչեն Արցախի անկախությունը։ Սա Արցախի անկախությունը ճանաչելու և պատերազմը կանգնեցնելու համար արվող շարժում է»,- նշեց ակցիայի կազմակերպիչներից մեկը։

Քայլերթի մասնակիցների առաջին կանգառը եղավ Ռուսաստանի դեսպանատունը։

Այնտեղ ակցիայի մասնակցիները բարձրաձայնեցին, որ հայ զինվորներն այժմ կենաց ու մահու կռիվ են տալիս ադրբեջանական ահաբեկիչների դեմ.

«Ադրբեջանը՝ լկտի Թուրքիայի հետ, որոշել է հարձակվել անկախ Արցախի վրա, և սա անհետևանք չպետք է մնա։ Պետք է ճանաչել Արցախի Հանրապետության անկախությունը։ Եվ պետք է հստակ հասկանալ, որ Արցախի անկախության ճանաչումը թույլ կտա վերջ տալ թուրք-ադրբեջանական հանցագործությանը»։