Ձեր վստահելի աղբյուրը

Այսօր առավոտյան ադրբեջանական  զինված ուժերը ԱԹՍ-ով  հարված են հասցրել Գեղարքունիքի մարզի Վարդենիս-Սոթք  հատվածին։ Վիրավորվել է 14-ամյա երեխա, որն այժմ հիվանդանոցում է։ Այս մասին հայտնում է ՀՀ մարդու իրավունքների պաշտպան Արման Թաթոյանը:

Նա նշել է, որ ԱԹՍ-ի հարվածի պահին դաշտում եղել են այլ մարդիկ, նաև երեխաները, որոնք կարտոֆիլ հավաքելիս են եղել: Ա. Թաթոյանը հայտնում է, որ հոսպիտալ է գործուղել հատուկ առաքելություն:

ՀՀ առողջապահության նախարարության մամուլի խոսնակ Ալինա Նիկողոսյանը հայտնում է, որ Հայաստանի Հանրապետության տարածքում Ադրբեջանի ագրեսիվ գործողությունների հետևանքով` անօդաչու թռչող սարքի հարվածից տուժել է 14 տարեկան երեխա, ով մեքենայով գնալիս է եղել դաշտ հողագործական աշխատանքի:

Պատանին բազմաթիվ վնասվածքներով տեղափոխվել է «Սուրբ Աստվածամայր» բժշկական կենտրոն: Այժմ գտնվում է վերակենդանացման բաժանմունքում: Վերջինիս առողջական վիճակը բժիշկները գնահատում են ծանր:

Երեխան ունի կրծքավանդակի բեկորային վնասվածք, ձախակողմյան հեմոպնևմոթորաքս, աջակողմյան պնևմոթորաքս, որովայնի սալջարդ։

Արցախի Տեղեկատվական շտաբը գրում է . « Վարդենիս համայնքում բնակվող Արզոյանների ընտանիքն այսօր առավոտյան սովորականի պես գնում էր իրենց հողատարածքը մշակելու։ Ադրբեջանական ԱԹՍ հարվածել է մեքենային։ Ընտանիքի 14-ամյա որդին' Նարեկը, բեկորային վնասվածքով, ծանր վիճակում տեղափոխվել է Երեւան, վերակենդանացման բաժանմունքում է»: