Ձեր վստահելի աղբյուրը

Երևանում ՄԱԿ-ի ներկայացուցիչը գնացել է հիվանդանոց՝ Ադրբեջանի հարձակումների հետևանքով վիրավորված քաղաքացիական անձանց տեսակցելու։ ՄԱԿ-ի երևանյան գրասենյակի մոտ ակցիա անող  քաղաքացիները հայտարարեցին, որ նա այդ քայլն արել է իրենց կողմից խնդրի բարձրաձայնումից հետո։

«Մեր ակցիայից հետո ՄԱԿ-ի ներկայացոցիչը տեղից շարժվեց։ Մենք այսուհետ կորդեգրենք այն ուղին, որ ստիպենք նրանց աշխատել ու խոսել»,- ասաց ակցիայի մասնակիցը։

Հիշեցնենք՝ ավելի վաղ գրել էինք, որ մի խումբ քաղաքացիներ ՄԱԿ-ի Երևանյան գրասենյակի մոտ բողոքի ակցիա են կազմակերպել։ Նրանք պահանջում են ՄԱԿ-ի ներկայացուցչին հստակ արձագանքել Արցախում տեղի ունեցող դեպքերին,ինչպես է թշնամին սպանում հայ գերիներին ու հստակ պատասխանել  հարցին՝ ինչու է լռում ՄԱԿ-ը։

«Մեր ակցիայի նպատակներից էր վիրավոր քաղաքացիների մասին բարձրաձայնելը։ Այսօր մեր հանրային ճնշման տակ ՄԱԿ-ի ներկայացուցիչը գնաց հիվանդանոց վիրավոր երեխաներին տեսակցելու։ Մենք այսօր, այս պահին դիվանագիտական ճակատում հաղթում ենք, ինչպես սահմանին»,- ասաց ակցիայի մասնակիցը։ 

Ակցիայի մասնակիցները նշեցին, որ իրենք հետևելու են այս գրասենյակի յուրաքանչյուր քայլին, հայտարարություններին, անհրաժեշտության դեպքում  կրկին կհավաքվեն։

Նրանք նաև ասացին, որ իրենց հիմնական նպատակն է, որպեսզի ՄԱԿ-ի Անվտանգության խորհուրդը որոշում կայացնի ու Ադրբեջանին պարտադիր խաղաղություն։

«Դա ՄԱԿ-ի առաքելությունն է, իր իրավասության մեջ է: Մեր նպատակն է խաղաղություն պարտադրել Ադրբեջանին»,- ասաց ակցիայի մասնակիցը։