Մեկ տասնյակից ավելի կուսակցություններ կառավարությունից պահանջում են օպերատիվ կառավարման շտաբ ստեղծել
«Հայաստանի քաղաքական կուսակցություններն անցնող քսան օրերի ընթացքում ցուցաբերել են բացառիկ համերաշխություն ու միասնություն»,- ՀՅԴ «Սիմոն Վրացյան» կենտրոնում ներկայացնելով հայաստանյան ավելի քան մեկ տասնյակ կուսակցությունների համատեղ հայտարարությունը, հայտարարեց ՀՅԴ Հայաստանի ԳՄ ներկայացուցիչ Իշխան Սաղաթելյանը։
Նա հիշեցրեց, որ պատերազմի մեկնարկից մեկ օր անց 14 քաղաքական ուժեր հանդես եկան հայտարարությամբ՝ նշելով, որ մի կողմ են դնում տարաձայնությունները, կանգնում են իշխանության կողքին ագրեսորի գործողությունները դադարեցնելու համար։
Ընդունած նոր հայտարարության մեջ, մասնավորապես, ասված է.
«Ադրբեջանի ու Թուրքիայի կողմից սանձազերծված պատերազմի 20-րդ օրն է։ Համայն հայ ժողովուրդը, խորհրդարանական ու արտախորհրդարանական ուժերը մեկտեղել են իրենց կարողությունները դիմագրավելու մեր երկու պետությունների դեմ ուղղված գոյապահպանական սպառնալիքին։
Ադրբեջանաթուրքական ագրեսիան ահաբեկչական տարբեր խմբավորումների ներգրավմամբ վերածվել է գլոբալ անվտանգությանն ուղղված իրական սպառնալիքի։ Հայության համար հայրենականի վերածված պատերազմը նոր ծավալներ է ստանում՝ հանգեցնելով մեծաթիվ անդառնալի կորուստների։
Պատերազմ սանձազերծած ագրեսորները՝ Ադրբեջանն ու Թուրքիան, անհաղորդ են միջազգային հանրության՝ անհապաղ հրադադար հաստատելու և ռազմական ճանապարհով հիմնախնդրի լուծումը բացառելու պահանջներին։
Ավելին, առաջին իսկ պահից Ադրբեջանը խախտել է ՌԴ-ում ձեռք բերված հումանիտար հրադադարի հաստատման համաձայնությունը։ Օրհասական այս իրավիճակում ռազմական, քաղաքական ու դիվանագիտական ճակատներում բեկում մտցնելը հրամայական է։
Ավելին, առաջին իսկ պահից Ադրբեջանը խախտել է ՌԴ-ում ձեռք բերված հումանիտար հրադադարի հաստատման համաձայնությունը։ Օրհասական այս իրավիճակում ռազմական, քաղաքական ու դիվանագիտական ճակատներում բեկում մտցնելը հրամայական է։
Ստեղծված կացությունը համազգային ներուժի ամբողջական և աննախադեպ զորաշարժ է պահանջում։
Դիմում ենք ՀՀ կառավարությանը և պահանջում.
1. Հրատապ կարգով ստեղծել ռազմաքաղաքական հարցերի օպերատիվ կառավարման շտաբ, պետական հատուկ մարմին՝ օժտելով նրան որոշումներ ընդունելու, գործողություններ կատարելու ու համակարգելու իրավասություններով։
2. Հայրենիքի պաշտպանությունն արդյունավետ կազմակերպելու համար ներգրավվել Հայաստանի և Արցախի Հանրապետությունների նախկին և գործող նախագահներին, վարչապետերին, պաշտպանության ու արտաքին գործերի նախարարներին, ռազմական ու քաղաքական փորձառություն ունեցող այլ անձանց»։
Հայտարարության ներքո ստորագրել են՝
Ազատություն կուսակցություն
Ազգային օրակարգ կուսակցություն
Ազգային Ժողովրդավարական միություն կուսակցություն
Ազգային ինքնորոշում միավորում կուսակցություն
Երկիր ծիրանի կուսակցություն
Ժառանգություն կուսակցություն
Համերաշխություն կուսակցություն
Հայ հեղափոխական Դաշնակցություն
Հայաստանի դեմոկրատական կուսակցություն
Հայաստանի Հանրապետական կուսակցություն
Հայրենիք Կուսակցություն
Հանուն սոցիալական արդարության կուսակցություն
Մեկ Հայաստան կուսակցություն։
Հայտարարությունը բաց է այլ կուսակցությունների համար։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
